Kjósum Ólafíu!

Nú stendur yfir kjör til formanns og stjórnar VR. VR er stærsta stéttarfélag landsins með yfir 32 þúsund meðlimi. Sitjandi formaður Ólafía B. Rafnsdóttir gefur kost á sér til endurkjörs. Ólafía hefur starfað sem formaður VR síðastliðin 4 ár og staðið sig með mikilli prýði. Viðhorf hins almenna borgara gagnvart VR og verkalýðshreyfingum almennt er lítið sem ekkert. Fólk lætur sig ekki varða um kjarasamninga, stöðu ungra og lágtekjufólks á húsnæðismarkaði, kaupmátt og atvinnuleysi svo eitthvað sé nefnt. Allt eru þetta atriði sem verkalýðsbatterí eins og VR vinna að.

Fasteignamarkaðurinn í dag er ómögulegur og fólk sem er nýkomið úr námi hefur litla möguleika á að eignast fasteign. Eðlilega fer sá einstaklingur að leita sér að leiguíbúð. Þar er staðan litlu skárri enda leiguverð rokið upp úr öllu valdi. Skortur er á húsnæði og lítill áhugi virðist vera meðal stjórnmálamanna að taka þessu vandamáli föstum tökum.

Á meðan þingmenn hugsa um að semja frumvörp um styrkingu á húsnæðismarkaði gekk VR í verkið. Árið 2015 var VR aðili að gerð kjarasamnings þar sem samið var um uppbyggingu 1560 leiguíbúða fyrir lægstu tekjuhópana á vinnumarkaði. Á þessum leiguíbúðum verður hámarks leiguverð sem miðast við 25% af tekjum leigjandans með teknu tilliti til húsnæðisbóta. Verkefnið er komið af stað og vonast VR til þess að fyrstu leiguíbúðirnar líti dagsins ljós árið 2019.

VR semur um kjarasamninga fyrir félagsmenn sína. Laun aðila vinnumarkaðarins ráðast af kjarasamningum og því er mikilvægt að vera með góða aðila í forsvari fyrir sig við gerð þeirra. Þegar hinn almenni félagsmaður í VR er spurður að því hvað eigi að setja í forgang við gerð slíkra kjarasamninga er oftast svarað í áttina að því að einstaklingurinn vilji kaupmáttaraukningu og stöðugleika.

Síðustu fjögur ár hefur Ólafía stýrt VR með þetta að leiðarljósi og í formannstíð hennar hefur kaupmáttur aukist um 20% og atvinnuleysi farið úr 6,2% niður í 2,9%. Það leikur enginn vafi á því að aðkoma VR við gerð kjarasamninga hefur haft stórkostleg áhrif á þessar tölur. Undir stjórn Ólafíu hefur rödd VR orðið sterkari og hefur félagið tekið aukinn þátt í þjóðfélagsumræðunni. Hér má nefna gagnrýni um vaxtamun bankanna, hækkun stjórnarlauna í bönkum og arðgreiðslur tryggingafélaganna.

Þegar Ólafía tók við keflinu var nýhafin vinna að jafnlaunavottun VR. Ég leyfi mér að fullyrða að án Ólafíu og sterkrar samstöðu stjórnar VR væri lítið fjallað um jafnlaunavottun í stjórnarsáttmála ríkisstjórnarinnar. Starf VR í þágu málefnisins síðustu fjögur ár hefur verið þjóðfélaginu gríðarlega dýrmætt. Nýverið hafa verið gerðar veigamiklar breytingar á verklagi við tilnefningu stjórnarmanna VR í stjórn Lífeyrissjóðs Verzlunarmanna. Markmiðið var að opna ferlið og gera það gegnsærra. Stjórn VR þótti það ólýðræðislegt að þau gætu kosið sjálfa sig inn í stjórn LV. Þörf umræða var um breytingar á þessu og ályktaði stjórn VR m.a. að það væri ekki við hæfi að þeir sem sætu í stjórn LV sætu einnig í stjórn þeirra fyrirtækja sem sjóðurinn ætti í. Í síðastliðinni viku tók SA upp þessa reglu og viku þrír stjórnarmenn sæti þar.

Undir stjórn Ólafíu setti VR í gang átakið VR-skóli lífsins. VR fann fyrir mikilli þörf á fræðslu fyrir ungt fólk um réttindi sín á vinnumarkaði enda víða pottur brotinn í þeim málum. Enn er marg brotið á ungu fólki á vinnumarkaði og telur VR það mjög brýnt málefni. VR telur að íslenska ríkinu hafi verið óheimilt að skerða rétt félagsmanna til atvinnuleysisbóta með því að stytta bótatímabilið um sex mánuði, eins og gert var með breytingum á lögum um atvinnuleysistryggingar. Félagið höfðaði mál til að fá þessu hnekkt og vann það í héraðsdómi en bíður nú eftir úrskurði Hæstaréttar.

Eftir að hafa kynnt mér starf VR síðustu fjögur ár er ég ekki í neinum vafa um að ég treysti Ólafíu B. Rafnsdóttur til áframhaldandi formannssetu og ég hlakka til að sjá hverju hún nær að áorka frekar í þágu okkar félagsmannanna.