Áfram blæðingar!

„Mundu svo bara segja að Rósa frænka sé komin í heimsókn ef þú byrjar allt í einu á túr…“ sagði vinkona mín við mig.

Þetta voru mín fyrstu kynni af orðræðu til að fela blæðingar.

Ég lærði að blæðingar væru feimnismál, eitthvað til að fela, eitthvað óhreint og síðast en ekki síst lærði ég að þær væru ógeðslegar. Enginn mátti sjá dömubindi eða túrtappa þegar maður skrapp á klósettið. Það mátti alls ekki koma túrblettur í gegn þá yrði maður hálshöggvinn.

En bara ef ég hefði vitað að þessar hugmyndir og allar þessar áhyggjur um að það þyrfti að fela blæðingar ættu ekki rétt á sér.

Þessar áhyggjur voru óþarfar. Blæðingar eru þáttur í heilbrigðri líkamsstarfsemi kvenna.

Þessar hugmyndir sem ég lærði um blæðingar um að þær væru eitthvað til að fela og eitthvað ógeðslegt er ekki hreinn og beinn sannleikur.

Hugmyndir manna um blæðingar er arfleifð menningar. Með því á ég við að hugmyndir manna um blæðingar verða ekki til í tómarúmi. Þær eru ekki hlutlausar. Það sem fólki finnst um blæðingar er breytilegt milli samfélaga. Sumum hópum finnst þær subbulegar á meðan öðrum hópum finnst þær eitthvað til að fagna og vilja láta alla fjölsylduna vita.

Fólk hefur alltaf áhrif á veruleika sinn. Með nýjum hugmyndum breytast samfélög og hugsunarháttur fólks. Nýjar hugmyndir líta dagsins ljós, þó svo að aldagömlu hugmyndirnar haldi föstu taki í bakkann.

Okkar nýju byltingarkenndu hugmyndir eru þær að,

blæðingar eru ekki eitthvað til að skammast sín fyrir,

ekkert til að fela,

þær eru tákn um frjósemi,

þær eru frábærar.

Með vitundarvakningu í samfélaginu getum við haft áhrif á hvernig blæðingum er tekið. Þar með getum við sagt að fólkið í samfélaginu stjórnar hugmyndum um blæðingar.

Fjöldinn stjórnar því hvað er talið eðlilegt.

Blæðingar eru eðlileg líkamsstarfssemi kvenna.

Áfram blæðingar!

#túrdagar#mérblæðir

Dagana 14.-16.mars stendur Femínistafélag Háskóla Íslands fyrir Túrdögum. Tilgangurinn er að opna og bæta umræðuna um túr og tengd málefni.

Á Túrdögum verður boðið upp á fjölbreytta fyrirlestra á Litla torgi í HÍ sem allir eiga það sameiginlegt að fjalla um túr, m.a. frá félagsfræði-, kynfræði-, líffræði- og málvísindalegu sjónarhorni. Einnig verður sett upp sýning á Bláa veggnum undir Háskólatorgi þar sem sýnd verða túrtengd listaverk, ljóð og sögur. Þáttakendur í sýningunni eru m.a. erlenda listakonan Rupi Kaur, myndlistakonan Þóra Þórisdóttir ásamt ljóðskáldinu Andra Snæ Magnasyni. Sýningin stendur frá 13.-27. mars.