Marsspá Siggu Kling – Krabbinn: Eins og eldspúandi halastjarna

Elsku hjartans krabbinn minn, það er hægt að segja með sanni að þetta er þinn tími. Þín orka hentar nákvæmlega inn í tímabil vorsins. Og þó að þér finnist vera læti í kringum þig þá er eins og þú látir þér fátt um finnast og heldur áfram að þínu takmarki eins og eldspúandi halastjarna sem enginn getur stöðvað.

Engar fortölur, neikvæðni eða slúður geta náð þér, því að þú ert orðinn svo miklu sterkari en þú hefur nokkurn tímann verið. Þú lokar og gengur frá persónulegum ágreiningi og þér líður svo vel með það að það er eins og þú hafir drukkið úr hamingjulindinni. Ég veit að þetta virkar hrikalega væmið, en stjörnurnar í kortinu þínu sýna svo greinilega að þetta tímabil er þitt maraþon og þú ert fremstur meðal jafningja.

Aðstæður í kringum þig sem tengjast veraldlegum hlutum eiga svo sannarlega eftir að pirra þig, en hversu mikilvægir eru þessir veraldlegu hlutir, þeir eru einskis nýtir því hamingjan býr svo sannarlega ekki í þeim.

Það verður eldmóður í talanda þínum svo að þú þarft ekki að setja hugsanir þínar í excel, orðin munu koma frá þér án þess að þú þurfir að hugsa þau fyrir fram og skipuleggja, það er eins og þú fáir þennan X-factor til þess að verða stórmenni. Þetta er líka sent til ykkar ef þið hafið haft hindranir í líkama ykkar, veikindi í líkama eða huga, því góðar fréttir og mikill kraftur munu hjálpa þér til að setja heilbrigða stefnu í allt sem tengist sál þinni. Þetta er besta spá sem ég hef nokkurn tíma sent ykkur elsku krabbalabbarnir mínir. Svona raðast þetta upp hjá þér, svo vert þú þakklátur fyrir gjafirnar sem alheimurinn gefur þér.

Í ástinni skaltu setja ástarorkuna til þín, þá muntu hitta manneskju sem léttir þér lífið og hlutirnir verða auðveldari með. En ef þú ert búin að vera í löngu sambandi þá eru skilaboðin að gera allt sem þú getur til að halda því áfram, því hjá þér bendir til að það komi nýtt upphaf að svo mörgu, en enginn endir er í sjónmáli.

Mottó: Í upphafi skal ekki endirinn skoða, því að núið gefur þér allt sem þú þarft.

Frægir Krabbar: Bryndís Schram, Sigga Lorange Ostabúðarskvísa, Auddi Blö, sem við elskum öll, Dagur B. Eggertsson, borgarstjóri og dúlla, Ólafur Stefánsson, handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason og Lars Lagerbäck landsliðsþjálfari, Davíð hinn góði skóari í Hafnafirði, Stefán Árni Pálsson fréttamaður, Th. forseti Íslands, Bento veitingakóngur, Friðbjörn Europartakóngur, Yesmine Olsen, höfundur og framleiðandi, George Michael, Kristófer Helgason, dagskrágerðamaður.