Það tekur greinilega bara eitt ár að byggja draumahúsið ef þú gerir það sjálfur og helst með aðstoð barnanna þinna.



Árið 2008 ákvað Cara Brookins að taka málin í sínar eigin hendur. Þá bjó hún með ofbeldisfullum eiginmanni sínum og á sama tíma var annar maður að áreita hana, en sá var andlega veikur. Hún á fjögur börn og vissi að hún myndi ekki hafa efni á því að kaupa hús fyrir þau fimm.



Brookins ákvað að yfirgefa eiginmann sinn, tók bankalán til að eiga fyrir smá landssvæði og byggingarefni og hreinlega byggði húsið sjálf.



Á endanum náði hún að reisa 330 fermetra hús með fimm svefnherbergjum, þriggja bíla bílskúr og fyrst og fremst draumahús fjölskyldunnar.



Brookins hafði ekki efni á því að greiða verkamönnum fyrir vinnu þeirra en með aðstoð vina og vandamanna og YouTube myndbanda náði hún að skaffa þak yfir höfuðið á börnunum sínum. Hún og börnin lærðu öll helling og reistu húsið í sameiningu.



Nú hefur þessi magnaða kona sett á laggirnar vefsíðu þar sem hún deilir sögu sinni og gefur öðrum ráð.