Nýársspá Siggu Kling – Ljónið: Ofkeyrðu þig nú ekki, taktu einn dag í einu, til þess eru þeir

Elsku fallega Ljónið mitt. Þetta er ár hreinsunar, nákvæmlega eins og maður setur bara skítug föt í hreinsun, þau koma eins og ný til baka. Þannig er þema þessa árs hjá þér, hjartað mitt. Þú færð svo sterka innri sýn á hvað er að hindra þig og hvernig þú getur leyst það. 

Þetta er ár þar sem mun verða mikill agi hjá þér í svo mörgu. Þú finnur styrk þinn aukast eftir því sem líður á árið. Fyrri parturinn af þessu ári verður töluvert hraðfleygur. Það er ekki endilega það sem hentar þér best, þó að þú vinnir mjög vel undir stressi eða álagi. Þú átt eftir að tímasetja hlutina betur og vera með það á hreinu að eina manneskjan sem þú getur stólað á, ert þú. 

Þegar þú sérð þetta eykst þér krafturinn. Heilmikið brask og skemmtilegheit verða núna á næstu mánuðum en ofkeyrðu þig nú ekki, taktu einn dag í einu, til þess eru þeir. Það er annaðhvort fólk núna í kringum þig eða mun koma inn í líf þitt áður en sumarið kemur sem mun bjóða þér gull og græna skóga. Sum þessara tilboða eru gerð af heilindum og miklu meira en orðin tóm. Svo leynast inn á milli einhvers konar tilboð sem eru marklaus með öllu. 

Þar af leiðandi þarftu að sýna mikinn styrk og ákveðni um hvað þú ætlar að velja og hverju þú ætlar að hafna. Leitaðu ráða í kringum þig, það er stundum æðislega gott. Þegar líða tekur á árið þá verða jafnvægi, ró, friður og öryggi sterkustu orðin sem ég get sent þér. Þú verður búin að vinna mikið í sjálfu þér og ekkert er fegurra en Ljón sem er ánægt með sjálft sig. Það verða dálitlir öfgar fyrstu mánuðina en það er bara allt í lagi því að það koma skemmtilegar sögur út úr því. 

Þú ert búið að loka hurðinni að því gamla og um hálsinn á þér hangir lykillinn að lífinu, svo ekkert úr fortíðinni getur skemmt fyrir þér á þessu ári Svo hafðu ekki áhyggjur af því. Þetta er mjög mikilvægt ár og það er eins og þú verðir helmingi vitrari eftir að árið líður. Þú tekur hlutunum öðruvísi og lætur alls ekki blása þig um koll. Sönn ást er það eina sem virkar þetta árið hjá þér, elskan mín, og þú munt vita það 100% hvað er sönn ást eða hvað er eitthvað sem þú átt ekki að vera að dvelja við. 

Það er alveg magnað og þú þarft að skilja að fólk sér þig allt öðrum augum en þú heldur að það geri. Þú hefur svo mikinn kraft og tign yfir þér og það eru svo margir sem langar að vera eins og þú. Brotin sjálfsmynd dregur þig niður og þetta er árið sem þú átt að byggja upp sjálfsmynd þína. Hafðu það í huga að það er engum að kenna og engum að þakka hver þú ert. Heldur skapar þú orkuna þína með því að trúa á að þú getir þetta og getir hitt sem þú vilt og sért það sem þú vilt vera og leyfir þér að vera montið af sjálfu þér.

Knús og klapp, Sigga Kling

Fræg Ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari, Agent Fresco, Ana Mafalda, besta húshjálp í heimi, Sema Erla Serdar, baráttukona, Rósa Ingólfsdóttir, sjónvarpskona, Anton Máni Svansson, kvikmyndaframleiðandi.