Marsspá Siggu Kling – Vogin: Það er eins og þú leggir þig 200% fram

Elsku vog, ég get ekki betur séð en að þú sért að fara inn í tímabil sem er eins og þín besta verslunarmannahelgi. Það er mikið að gerast, margar áhættur teknar og ótrúlegir sigrar yfir svo mörgu að það sem miður fer virðist vera svo lítið og óttalega ómerkilegt að ég nenni ekki einu sinni að lýsa því.

Það er eins og þú elskir spennuna sem birtist þér í svo mörgum myndum. Með þennan kraft er eins og þú hafir unnið Óskarsverðlaunin, næstum eins og La La Land gerði.

Þú átt eftir að hafa góða yfirsýn og ná að gera hlutina í hárréttri röð þannig að þér verður veitt athygli fyrir margt. Þú átt svo sannarlega eftir að sjá það að þú hefur kraft og orku til að standa þig í þeim verkefnum sem eru yfir þér. Það er eins og þú leggir þig 200% fram, þú munt vita að þetta er þinn tími til að sýna þér þitt rétta andlit og vera einlæg og segja nákvæmlega hvernig þú vilt hafa hlutina. Ekki láta neinn í kringum þig þurfa að geta í eyðurnar.

Að hika er sama og tapa og þú þarft að þora til að skora. Þetta er tímabilið sem hugrekkið verður svo sannarlega vinur þinn, þú horfist í augu við sjálfan þig án ótta og sérð þá svo sannarlega að þú hefur upp á allt að bjóða sem þú þarft til að hafa hamingjuna í kringum þig.

Er það ekki það eina sem við þurfum að vera - hamingjusöm? Þú munt smávegis þurfa að plana fram í tímann, það er nú alveg gott og blessað á meðan þú hefur ekki hugann langt á undan þér í tímanum. Því þá nærðu ekki að njóta hamingjunnar sem er hér og nú! Það er allt í lagi að plana, skrifaðu niður hvernig þú vilt hafa þín plön og hafðu trú á því að það gerist, en þú þarft að læra það að sleppa framtíðarplönunum úr huganum þínum svo að alheimsorkan geti hjálpað þér.

Þetta er nákvæmlega eins og hjá þeim sem stóðu að myndinni La La Land og byggðu í kringum þetta magnaða verk - það þarf að ráða góða leikara í öll hlutverk og svona er þetta nefnilega hjá þér.

Mottó: Andaðu inn hamingjunni og andaðu frá þér hamingjunni.

Frægir í Voginni: Kári Árnason landsliðsmaður, Glúmur Baldvinsson stjórnmálafræðingur, Hjalti flugþjónn, Ingi í Sign, Jón Axel Ólafsson athafnamaður, Matt Damon leikari, Íris Berg, fatahönnuðurinn minn, Mary Poppins, Svanhildur Hólm Valsdóttir, aðstoðarmaður ráðherra og sjónvarpskona, Hanna Birna Kristjánsdóttir, Lilja Dögg Alfreðsdóttir alþingiskona, Ósk Gunnarsdóttir útvarpskona, María Einarsdóttir ritari stjörnuspánnar, Arnþrúður Karlsdóttir útvarp Saga, Skúli Mogensen, Walter Matthau, Olavia Newton John, Ragga Gísla, Steinn Steinarr, Margret Tatcher.