Marsspá Siggu Kling – Steingeit: Ótrúlegi persónuleiki sem þú hefur á eftir að gera það

Elsku hjartans frábæra steingeitin mín, þú hefur svo frjótt og athyglisvert ímyndunarafl svo hugur þinn á auðvelt með að sveiflast frá einni hugmynd í aðra. Þú vilt vera sú persóna sem tekur áhættu en það skiptir þig samt svo miklu máli að vera heiðarleg og hafa allt á hreinu. Það getur hindrað þig eins asnalega og það kann að hljóma.

Því það er í eðli þínu að gera allt fyrst fyrir aðra og setja svo súrefnisgrímuna á sjálfan þig en þar sem þú ert svo mikill töffari getur þú sett á þig þannig grímu að öðrum finnist þeir ekki ná að hjarta þínu. Og þú verður alltaf jafn hissa af því þér finnst þú í raun vera með svo opið hjarta og að öllum sé boðið inn.

Í ástinni er í eðli þínu að stjórna. Þú vilt gera nákvæmlega það sem þú vilt, þó þú sért kurteis og hlýr við hinn aðilann. Yfir þetta tímabil sem þú ert að fara í er það samvinna sem stýrir ferðinni.

Að vinna í einlægni með ástinni , gefa nýjan kraft og innspýtingu í vinnuna þína og ákveða hvar og hvernig þú vilt byggja upp heimilið þitt. Skynsemi er oft aðaleinkenni þitt en það getur verið leiðigjarnt að vera of skynsamur, þú ert þó manneskjan sem fólkið trúir og treystir á. Þú ert eins og stóra tréð í skóginum sem skýlir öðrum trjám fyrir veðri og vindum.

Hóaðu saman vinum þínum og já, þú átt marga. Þú hefur nefnilega í gegnum tíðina gert í því að vera góður við þá. Það er mikilvægt að hafa þá í kringum þig í vinnunni og í þeim verkefnum sem þú ert að vinna, því aflið sem þú færð er frá vinum þínum. Þessi ótrúlegi persónuleiki sem þú hefur á eftir að gera það að verkum að vinir þínir bjóðast til að hjálpa þér að láta drauma þína verða að veruleika.

Mottó: Daður er alheims tungumál og ég kann það.

Frægar Steingeitur: Guðjón Pétur Lýðsson markakóngur, Svava Johansen í Sautján, Ingibjörg Sólrún Gísladóttir, dr. Kristín Ólafsdóttir og Davíð Oddsson, Jón Gnarr, Elvis Presley, Gunnar Þórðarson, Tómas Guðbjartsson læknahetja, Lovísa Tómas, Dorrit Moussaieff forsetafrú, Þuríður Blær Jóhannsdóttir, leikkona og Reykjavíkurdóttir, Jesús og Simmi á Fabrikkunni, Óttar Proppé, Ingveldur Ægissdóttir módir og kvunndagshetja.