Útskrifaður af sjúkrahúsi eftir hnífstungu í Amsterdam

Maðurinn sem stunginn var með hnífi í Amsterdam í Hollandi í fyrrakvöld hefur verið útskrifaður af sjúkrahúsi. Árásarmannsins er enn leitað en möguleiki er á að lýst verði eftir honum í fjölmiðlum, að því er greint er frá á vef RÚV.

Árásin átti sér stað á fjölfarinni götu í norðurhluta Amsterdam í kringum miðnætti að staðartíma. Hinn grunaði er sagður hafa flúið vettvang og haldið í átt að ferju sem flytur gangandi og hjólandi vegfarendur milli borgarhluta.

Bundnar eru vonir við að upptökur úr eftirlitsmyndavélum hjálpi til við rannsóknina. Ef ekki, verður væntanlega lýst eftir manninum í fjölmiðlum.

Árásir á borð við þessa eru ekki algengar í þessum hluta borgarinnar, að sögn lögreglu á staðnum.