Áreitt kynferðislega í gufuklefa úti á landi: „Hef aldrei upplifað mig jafn varnarlausa“

„Ég var kynferðislega áreitt í gufuklefa úti á landi í sumar. Á ferðalagi í ókunnugu bæjarfélagi álpaðist ég með vinkonu minni inn í pínulítinn gufuklefa, líklega þann minnsta sem ég hef séð. Eða kannski var hann stór, í minningunni var hann lítill og myrkur.“

Þannig hefst pistill Áslaugar Karenar Jóhannsdóttur, blaðamanns á Stundinni, sem birtist á vef blaðsins í dag. Þar lýsir Áslaug vægast sagt óþægilegri upplifun sinni í gufuklefa í ónefndri sundlaug úti á landi í sumar þegar maður áreitti hana kynferðislega í klefanum sjálfum og á sundlaugarbakkanum.

Í samtali við Vísi vill Áslaug ekki gefa upp í hvaða laug atvikið varð þar sem hún kveðst ekki vilja benda á neinn, hvorki ákveðið bæjarfélag né annað.

Áslaug lýsir því í pistlinum að hún hafi verið hrædd og að það sem átti „að vera nokkurra mínútna slökun hafi orðið að einhverju allt öðru.“ Maðurinn sagði meðal annars við hana að hann væri „ljóti karlinn“ og að þau gætu „alveg tekið einn stuttan.“

Aldrei dottið í hug að kæra áreitnina

Hún og vinkonan sem var með henni forðuðu sér út úr gufuklefanum en maðurinn elti þær og náði þeim á sundlaugarbakkanum:

„Allt í einu var rifið í handlegginn á mér og þrekinn maðurinn stóð ógnandi yfir mér. Nú þegar við stóðum upprétt gat hann virt líkama minn fyrir sér betur og byrjaði strax að tala með ágengum hætti um vaxtarlag mitt. Þarna stóð ég, á sundfötunum einum fata, og hef aldrei upplifað mig jafn varnarlausa. Ég var raunverulega hrædd, sem hann hlýtur að hafa skynjað þegar ég nánast grátbað hann um að láta mig vera. Þá hló hann og sneri aftur í gufuklefann.“

Konurnar létu síðan sundlaugavörð vita af manninum sem sagði að verið væri að fylgjast með honum. Áslaug segir í pistlinum að henni verði oft hugsað til þessa atviks og að það hafi líklega haft meiri áhrif á hana en hún hafi þorað að viðurkenna í fyrstu. Þá segir hún í lok hans að henni hafi aldrei dottið í hug að kæra og setur það í samhengi við dóm sem maður fékk nýlega fyrir að áreita tvö 17 ára stráka í gufuklefa í sundlaug.

Telur að flestar konur hafi upplifað svipaða hluti

Spurð út í viðbrögð sín og það að aldrei hafi hvarflað að henni að kæra segir Áslaug það athyglisvert að setja sín fyrstu viðbrögð við áreitninni í samhengi við dóminn enda séu fyrstu viðbrögð kvenna sem verða fyrir kynferðislegri áreitni sjaldnast að kæra.

„Hversu margar kærur væri hver kona búin að leggja fram að meðaltali ef hún myndi kæra í hvert skipti sem hún er áreitt? Það væri athyglisvert að vita. Ég brást sjálf við með því að gera lítið úr minni eigin upplifun sem sýnir sig best í því að um leið og ég upplifði mig örugga aftur fór ég að hlæja, en nokkrum sekúndum áður nötraði ég og skalf af hræðslu. Ég þykist vita að flestar konur búa yfir sams konar upplifun og þess vegna er svo athyglisvert að setja þær í samhengi við þennan dóm,“ segir Áslaug.

Pistil Áslaugar má lesa í heild sinni hér.