Treysta Fjarðarkaupum fyrir jólunum

KYNNING Verslunin Fjarðarkaup í Hafnarfirði er einstök á sinn hátt. Þar er vöruúrval einstaklega fjölbreytt og persónuleg þjónusta laðar að trygga viðskiptavini. Mikil alúð er lögð við kjötborðið sem svignar undan kræsingum nú fyrir jólin.

Fjarðarkaup eiga sér langa sögu í Hafnarfirði. Hana má rekja til ársins 1973 en Fjarðarkaup hafa verið á núverandi stað við Hólshraun frá árinu 1982. Þar hefur verslunin vaxið og dafnað. Viðskiptavinir Fjarðarkaupa koma af öllu höfuðborgarsvæðinu enda er aðkoma að versluninni góð og næg bílastæði. Hafnfirðingar segja sjálfir að Fjarðarkaup séu eins og félagsmiðstöð, þar rekst maður alltaf á einhvern kunnugan.

Gísli Sigurbergsson, einn eigenda Fjarðarkaupa, segir að fyrirtækið leggi mikinn metnað í kjötborðið alla daga og sérstaklega fyrir hátíðir. „FK-hamborgarhryggurinn er okkar stolt. Kjötið er sérvalið, reykt og saltað fyrir Fjarðarkaup. FK-hamborgarhryggurinn hefur verið mjög vinsæll undanfarin ár og mest seldi jólamaturinn hjá okkur,“ segir Gísli. „Reyndar er svínakjöt vinsæll matur á jólunum en í öðru sæti hjá okkur er heill svínabógur, síðan lambahryggur eða -læri og loks purusteikin,“ segir hann enn fremur. „Svínakjöt er ódýr matur og það hefur verið mikil aukning í sölu þess hjá okkur undanfarið,“ bætir Gísli við en Fjarðarkaup er líka með mikið úrval af hangilærum og frampörtum, nautasteikum og alls kyns villibráð.

„Við leggjum ríka áherslu á metnaðarfullt kjötborð. Tveir kjötiðnaðarmenn starfa hjá okkur við að þjóna viðskiptavininum eftir hans þörfum. Hægt er að panta alls kyns útfærslur af fylltum lambalærum eða lambahryggjum. Við erum með veglegt kjötborð og persónulega þjónustu. Allir geta fundið rétta jólamatinn enda er kjötborðið okkar sérstaða og starfsfólkið sinnir öllum óskum viðskiptavinarins.“

Það eru ekki margar verslanir sem bjóða upp á jafn fjölbreytt úrval í kjötborði og Fjarðarkaup. Viðskiptavinurinn velur kjötið sjálfur og því er pakkað á staðnum. Þannig veit fólk alltaf að hverju það gengur í Fjarðarkaupum. Þótt borðið sé stútfullt af jólakræsingum þessa dagana þá er einnig fiskborð í Fjarðarkaupum þar sem boðið er upp á nýjan fisk og fiskrétti. Gísli segir að sömuleiðis sé hægt að fá skötu en hún er í lofttæmdum umbúðum til þæginda fyrir viðskiptavininn.

Í Fjarðarkaupum er mikið vöruúrval og viðskiptavinir geta fengið allt sem þá vantar fyrir jólin. „Við erum með fjölbreytt meðlæti með jólamatnum, hvort sem það er með FK-hamborgarhryggnum eða öðrum réttum,“ segir Gísli en þess má geta að í Fjarðarkaupum er heimilisdeild þar sem er úrval af fallegri gjafavöru. Þá er hægt að grípa jólanáttfötin eða -nærfötin með í verslunarferðinni í Fjarðarkaup.

Verslunin Fjarðarkaup verður opin til kl. 19 í dag og 22 á föstudag og laugardag. Hægt er að skoða afgreiðslutíma á heimasíðunni www.fjardarkaup.is