Norðlensk fjölskylda varð 50 milljónum króna ríkari eftir ráðleggingar miðils

Fjölskylda á Norðurlandi varð 50 milljónum króna ríkari eftir útdráttinn hjá Happdrætti Háskóla Íslands fyrr í vikunni. Vinningurinn er sérlega merkilegur vegna þess að miðill hafði ráðlagt fjölskyldunni að kaupa sér miða. Þetta kemur fram í tilkynningu frá Happdrætti Háskóla Íslands.

Þar segir meðal annars að fjölskyldufaðirinn sem hafi fengið símtalið með tilkynning um vinninginn á miðvikudagskvöldið hafi kiknað í hnjánum og þurft að fá sér sæti á gólfinu til að meðtaka þær.

„Að sjálfsögðu varð hann gríðarlega kátur en gat um leið deilt því að honum hefði verið ráðlagt af miðli að kaupa sér happdrættismiða hjá Háskólanum í lok síðasta árs.

Sagði miðillinn að hann yrði heppinn í peningamálum á árinu 2017 og sú varð aldeilis raunin. Hafði fjölskyldan heppna raunar spilað í happdrættinu um árabil en ekki með vinningsnúmerinu.“

Í tilkynningunni kemur fram að faðirinn hafi sett sig í samband við Fjölumboðið á Akureyri og keypt vinningsmiðann og annan miða til.

Unga fjölskyldan sér fram á bjarta tíma en ætlar að nota milljónirnar fimmtíu til þess að greiða niður skuldir og eiga sjóð til framtíðar.