Ísland án forseta á miðnætti

Ólafur Ragnar Grímsson, forseti Íslands, lætur af embætti á miðnætti. Þá fara handhafar forsetavalds með forsetavald fram að innsetningu Guðna Th. Jóhannessonar í embættið síðdegis á morgun. Embættistakan mun fara fram samkvæmt hefðum og venjum en vonast er til að almenningur mæti á Austurvöll og fagni nýjum forseta.

Guðni Th. Jóhannesson verður settur í embætti sem sjötti forseti lýðveldisins við hátíðlega athöfn síðdegis á morgun. Frá miðnætti í kvöld þar til Guðni verður settur í embætti í Alþingishúsinu fara handhafar forsetavalds með forsetavald en þeir bjóða til embættistökunnar á morgun. Hátíðin hefst klukkan 16 með helgistund í Dómkirkjunni en þaðan er gengið í Alþingishúsið þar sem forseti Hæstaréttar gefur út kjörbréf og staðfestir niðurstöðu forsetakosninganna. Ragnhildur Arnórsdóttir, ráðuneytisstjóri í forsætisráðuneytinu segir að allt sé nú til reiðu enda hefur skipulagning staðið yfir undanfarnar vikur.

„Handhafar forsetavalds bjóða til athafnarinnar. Það eru þeirra starfsmenn og fjölmargir aðrir, bæði opinberir starfsmenn og einkaaðilar sem hafa verið að undirbúa þetta undanfarnar vikur.“

Samkvæmt venjum og hefðum.

Venju samkvæmt skipta hefðir miklu máli í embættistöku forseta. Ragnhildur segir embættistökuna skipta mestu máli en hún hefur nær alltaf verið eins.

„Hún hefur verið það nema í fyrsta skipti þegar Sveinn Björnsson var kjörinn af Alþingi til árs.“

Eftir að Guðni Th. Jóhannesson verður formlega orðinn sjötti forseti lýðveldisins mun hann stíga á svalir Alþingishússins og minnast fósturjarðarinnar en vonast er til að góð mæting verði á Austurvelli á morgun á morgun en risaskjá verður komið upp þar sem hægt verður að fylgjast með beinni útsendingu frá athöfninni.

Ólafur Ragnar á einungis nokkra klukkutíma eftir í embætti og ljóst að lífið eftir að nýr forseti hefur tekið við verður þónokkuð frábrugðið því sem verið hefur.