Októberspá Siggu Kling – Vog: Þú þarft bara að lyfta símtólinu og hringja

Elsku hjartans Vogin mín. Nú er að duga eða drepast og þá er bara einn kostur, að duga. Þú ert að fara yfir á hátind ársins, sem er þessi mánuður. Hafðu ekki áhyggjur þó að eitthvað sé að gerast, það er bara til að leiða þig á beinu brautina. Lífið hefur lag á að leysa sig sjálft og það er að gera það.

Þú færð tilboð um að taka að þér eitthvert nýtt hlutverk sem yrði bara viðbót við það sem þú ert að gera. Þú þarft að skella þér í boxhringinn. Það verður ekkert nema óvæntur og spennandi endir. Þú þarft að hafa fyrir hlutunum á næstunni og það verður létt verk um leið og þú hugsar að þú getir það. Það er eins og þú sért að endurforrita hugann. Þú ert með betri skilning á hversu sterk þú ert.

Leiðindi gærdagsins og erfiðleikarnir sem þú áttir við að stríða eru að fara til fortíðar. Það býr svo mikill leiðtogakraftur í þér og þú þarft að spyrja þig: Er ég í réttri vinnu? Er ég í réttum skóla? Er ég glöð í því sem ég geri? Því núna er nákvæmlega tíminn til að taka nýjar ákvarðanir og færa sig til.

Sjálfstraust þitt er að eflast og þú tekur hlutina ekki eins nærri þér og þú gerðir á sama tíma í fyrra. Þetta er svo sannarlega tíminn þinn og það verður mikill kraftur í merkinu þínu fram í byrjun desember.

Á þessum tíma þarftu að ljúka skipulagi og skrifa niður hvernig þú ætlar að leikstýra þessu lífi. Það kemur mikið af skilaboðum til þín sem eru send í gegnum fólk sem þú jafnvel þekkir ekki, kemur rétt inn í líf þitt en breytir því samt og fer snögglega aftur. Það er að myndast svo mikill kraftur og orka og það er ástæðan fyrir því að þú ert byrjuð í maraþoninu og komin langt á undan öðrum, þú þarft bara að taka eftir því. Fjárfestingar í einhverju skemmtilegu passa akkúrat vel núna.

Þú virðist sjá það að þú eigir meiri peninga en þú bjóst við. Og svo sannarlega áttu nóg af vinum en þú átt til að gleyma því. Það er alveg ljóst að draumar hafa ekki síðasta söludag og sem betur fer átt þú þér marga drauma og það er mjög margt að koma til þín núna og næstu mánuði. Fólk mun koma þér á óvart. Það mun skilja þig betur og það verður auðveldara fyrir þig að gera það sem þú ert að gera því þú átt eftir að finna að fólkið fylgir þér. Ef þér finnst þú vera einmana er það alfarið þín sök.

Þú þarft bara að lyfta símtólinu og hringja og það eru allir tilbúnir að vera með þér. Það gæti verið heilmikið að gerast í ástamálum því það er allt á suðupunkti. Ef þú ert ánægð í þínu samband skaltu bara efla það, það væri besta lausnin. Annars geturðu fengið það sem þú vilt en þú þarft að bera þig eftir því. Ekki vera hrædd um höfnun, það er ekki í kortunum þínum. Núna eða aldrei væri æðislegt slagorð fyrir næsta tíma.

Knús og klapp, Sigga Kling

Sigga býður upp á þjónustunámskeið fyrir fyrirtæki af öllum t0ga: Hópefli – hressingarfyrirlestur sem getur verið hentugur í hádegishlé eða í byrjun vinnudags. Einnig tekur hún að sér hópa sem vilja eiga jákvæða og gleðilega kvöldstund. Þeir sem hafa áhuga gefa haft samband við Siggu með því að senda tölvupóst á siggakling@gmail.com