Innlent

Skattsvikamálið: Gekkst við brotum þar sem hundruð milljóna króna komu við sögu

Kolbeinn Tumi Daðason skrifar
Málið var þingfest í Héraðsdómi Reykjaness í morgun. Sjö sakborninganna neituðu sök í morgun en sá áttundi gekkst við brotunum sem honum er gefið að sök í ákæru.
Málið var þingfest í Héraðsdómi Reykjaness í morgun. Sjö sakborninganna neituðu sök í morgun en sá áttundi gekkst við brotunum sem honum er gefið að sök í ákæru. Vísir
Karlmaður um fertugt sem sætir ákæru ríkissaksóknara fyrir peningaþvætti í umfangsmiklu virðisaukaskattsmáli gengst við því sem honum er gefið að sök í ákærunni. Maðurinn er einn sjö, fimm karla og tveggja kvenna, sem ákærð eru fyrir aðild sína að því að svíkja hátt í 300 milljónir út úr ríkinu. Áttundi maðurinn er ákærður fyrir vörslu á ellefu kílóum af hassi sem fannst við rannsókn lögreglu.

Málið er eitt það umfangsmesta sinnar tegundar hér á landi og hefur verið til rannsóknar hjá yfirvöldum í á sjötta ár.

 Þingfesting var í málinu í Héraðsdómi Reykjaness í morgun. Sjö sakborninganna neituðu sök í morgun en sá áttundi gekkst við brotunum sem honum er gefið að sök í ákæru. Var hann fenginn, að beiðni Steingríms Þórs Ólafssonar, til þess að gerast prófkúruhafi að bankareikningi í Arion banka og annars vegar tekið á annað hundrað milljón krónur útaf reikningnum og hins vegar millfæra tæplega hundrað milljón krónur af sama reikningi.

 Þá gekkst hann við því að hafa farið að leiðbeiningum Steingríms Þórs og sótt tæplega tíu milljónir króna til konu sem einnig er ákærð í málinu og afhent öðrum manni sem ákærður er í málinu 17 milljónir króna. Verjendur þurfa að leggja fram greinargerðir sínar þann 30. júní en reikna má með því að aðalmeðferð verði í málinu í haust.

 Þóttust starfa í byggingariðnaði

 Málið kom upp í september árið 2010. Svikin eru sögð hafa farið þannig fram að fólkið setti á fót sýndarfyrirtæki í þeim eina tilgangi að svíkja fé út úr skattkerfinu.

 Fyrirtækin höfðu enga raunverulega starfsemi en fengu í krafti falsaðra gagna og aðgangs að fyrrnefndum starfsmanni Ríkisskattstjóra stórfé vegna byggingar þriggja húsa sem aldrei voru reist. 

 Fyrirtæki gátu þá fengið sérstaka heimild til endurgreiðslu á innskatti á meðan uppbyggingu stóð. Fólkinu tókst þannig að svíkja rúmlega 270 milljónir króna út úr virðisaukaskattskerfinu. Þeir peningar hafa aldrei fundist.

Steingrímur Þór Ólafsson hélt af landi brott til Suður-Ameríku nokkrum dögum áður en upp komst um svikin og handtökurnar fóru fram.
Flúði til Venesúela

 Rannsókn lögreglu var viðamikil og var húsleit gerð víða á meðan henni stóð. Að minnsta kosti níu voru handteknir í tengslum við málið.

 Grunaður skipuleggjandi er Steingrímur Þór Ólafsson en hann hélt af landi brott til Suður-Ameríku nokkrum dögum áður en upp komst um svikin og handtökurnar fóru fram. Alþjóðadeild hjá embætti ríkislögreglustjóra lýsti eftir Steingrími að fenginni ákvörðun dómsmálaráðuneytisins og að beiðni lögreglunnar á höfuðborgarsvæðinu.

 Steingrímur var eftirlýstur af Interpol vegna gruns um eiturlyfjasmygl, skjalafals, peningaþvætti og skattsvik. Hann var svo handtekinn á Santiagó Marínó flugvelli á eyjunni Margarita, þegar hann ætlaði að fara þaðan til Frankfurt í Þýskalandi, að eigin sögn á leið sinni til Íslands. Hann hafði þá dvalið í Venesúela í fimm daga. Fjölmiðlar þar í landi sögðu frá handtöku Steingríms, birtu nafn hans og myndir af honum.

 Risamál á íslenskan mælikvarða

 Einn áttmenninganna er ekki ákærður fyrir beina aðild að skattsvikamálinu heldur fyrir að hafa geymt ellefu kíló af hassi á heimili sínu og maka síns fyrir Steingrím Þór. Fíkniefnin fundust við húsleit lögreglu í tengslum við skattsvikamálið. Hann mun taka afstöðu til ákærunnar við fyrirtöku málsins í næstu viku.

 Steingrímur er ákærður fyrir fíkniefnabrot fyrir að hafa komið með hassið í tösku á umrætt heimili. Þá er konan sömuleiðis ákærð fyrir vörslu efnanna. Þau neituðu bæði sök við þingfestinguna í dag.

Rannsókn lögreglu á málinu lauk árið 2013 og fór málið í kjölfarið á borð ríkissaksóknara. Á þriðja ár tók að gefa út ákæru í málinu sem er mjög umfangsmikið og gögn málsins í takti við það.

Einn þyngsti dómur sem fallið hefur í skattsvikamáli hérlendis var í svokölluðu Vatnsberamáli þar sem skattsvikin námu 38 milljónum króna. Þórhallur Ölver Gunnlaugsson, nú Þór Óliver, var þá dæmdur til þriggja ára fangelsisvistar og 20 milljóna króna sektargreiðslu. Dómurinn var sá þyngsti í málaflokknum á þeim tíma.

 


Tengdar fréttir

Mest lesið


Fleiri fréttir

Sjá meira


×

Mest lesið