Ættingjar höfða mál gegn Putin vegna MH17

Ættingjar farþega malasísku flugvélarinnar sem skotin var niður yfir Úkraínu hafa höfðað mál gegn Vladimir Putin, forseta Rússlands, vegna atviksins. Lögmannafyrirtæki frá Ástralíu, sem einnig vann fyrir ættingja fórnarlamba í Lockerbie árásinni, sér um málið og farið er fram á tíu milljónir dala í bætur fyrir hönd hvers fórnarlambs.

Flugvélin var skotin niður á flugi yfir yfirráðasvæði aðskilnaðarsinna sem eru hliðhollir Rússlandi í austurhluta Úkraínu þann 17. júlí 2014. Allir farþegar og áhöfn, alls 298 manns, létu lífið. 28 Ástralar voru um borð í flugvélinni sem var á leið frá Amsterdam til Kuala Lumpur.

Samkvæmt Sky News koma ættingjar farþega frá Ástralíu, Malasíu og Nýja-Sjálandi að lögsókninni.

Hollensk rannsóknarnefnd komst að þeirri niðurstöðu að flugvélin hefði verið skotin niður með eldflaug af rússneskri gerð. Rússar þvertóku þó fyrir það og fóru fram á nýja rannsókn sem gerð yrði af Sameinuðu þjóðunum.