Sextíu og fjórir bílar teknir í eftirlit

Afskipti voru höfð af 64 leigubílum og hópferðabílum í eftirliti í Sundahöfn í Reykjavík í síðustu viku. Lögreglan á höfuðborgarsvæðinu framkvæmdi eftirlitið samvinnu við Ríkisskattstjóra.

„Þarna koma skemmtiferðaskip og er töluvert af bílum sem taka á móti gestunum. Afskipti voru höfð af bílstjórum bílanna þar sem þeir voru kyrrstæðir á bílastæðunum hjá Sundahöfn,“ segir Guðbrandur Sigurðsson, aðalvarðstjóri umferðardeildar lögreglunnar á höfuðborgarsvæðinu.

Guðbrandur segir að lögregla hafi kannað ökuréttindi ökumanna og skráningu ökutækja og hópbifreiða. Einn ökumaður hafi verið með útrunnið ökuskírteini en að öðru leyti hafi meira og minna allt verið í lagi sem snýr að lögregluafskiptum.

Steinþór Haraldsson, starfandi ríkisskattstjóri, segir að eftirlit Ríkisskattstjóra hafi beint athugasemdum til þó nokkurra aðila.

„Við könnum hvort viðkomandi sé á skrá hjá okkur yfir atvinnurekendur og standi í skilum á staðgreiðslu- og virðisaukaskatti. Eins könnum við hvort starfsmenn séu á launaskrá. Það voru þó nokkrir sem þurftu að laga sín mál,“ segir Steinþór og bætir við að menn fái tíma til að bæta úr sínum málum.

Um ræði viðvarandi eftirlit á vegum Ríkisskattstjóra. „Þetta eru fyrst og fremst fyrirbyggjandi aðgerðir,“ segir Steinþór.

Þessi frétt birtist upphaflega í Fréttablaðinu.