116 lögregluútköll á nýársnótt

Lögreglan á höfuðborgarsvæðinu þurfti að sinna alls 116 útköllum milli klukkan ellefu í gærkvöldi og ellefu í morgun. Hávaðaútköll í heimahúsum og útköll vegna minniháttar umferðaróhappa voru mörg þessa nýársnótt en einnig nokkur alvarlegri útköll, að því er kemur fram í fréttatilkynningu.

Alls voru þrír vistaðir í fangageymslu í nótt grunaðir um líkamsárás og verða yfirheyrðir í dag. Annar var handtekinn í Kópavogi vegna ágreinings í heimahúsi og enn annar á skemmtistað í miðborginni vegna slagsmála og þótti hann ekki í ástandi til að vera á ferðinni.

Skemmtistað í miðbænum var lokað á sjöunda tímanum í morgun vegna brota á lögum um veitinga- og gististaði. Staðurinn var opinn of lengi og áfengi veitt innandyra. Óskað var eftir aðstoð lögreglu til að reka út úr partíi í heimahúsi í vesturbænum rétt fyrir fjögur og var einn gesta vistaður í fangageymslu þar sem hann reyndist vera með ætluð fíkniefni á sér.

Þá var tilkynnt um rúðubrot og annars konar skemmdarverk. Meðal annars voru tvær rúður brotnar í skóla í Breiðholti en sökudólgarnir eru óþekktir.