Takk Kári og Sigmundur Davíð!

Kári Stefánsson, takk fyrir skannann sem þú gafst þjóðinni. Auðvitað á Landspítalinn ekki að þurfa að treysta á svona gjafir. Ég skrifaði undir á endurreisn.is vegna þess að ég er sammála þér um að það ætti að verja meiru fé í heilbrigðiskerfið. En alls ekki af því að ég vilji nýjan Landspítala við Hringbraut, það er ekkert samasem merki þar á milli, ég ítreka það!

Kári segir í bréfi sínu á föstudaginn sl.: „Vífilsstaðalandið er fallegt og ég er handviss um að það er í sjálfu sér miklu hentugra til þess að setja þar niður spítala heldur en Hringbrautarlóðin.”

Flestir eru sammála því að þörf er á nýjum spítala, en skv. könnunum vill meirihluti þjóðar að hann rísi ekki við Hringbraut. Ég vil því sérstaklega þakka Sigmundi Davíð fyrir að þora að opna þessa mikilvægu umræðu um staðsetningu nýs Landspítala, sem svo margir eru ekki sáttir við en þora ekki að nefna. En Sigmundur Davíð það er ekki nóg að gaspra í fjölmiðlum, það þarf að sýna það í verki að hugur fylgi máli. Þú ert í þeirri stöðu að geta beitt þér fyrir því að taka þetta mál upp og breyta lögunum um staðsetninguna á Alþingi. Nú er tækfærið fyrir þig og aðra alþingismenn til að taka af skarið. Það er ótrúlegt að það skuli vera haldið svona fast í gamla ákvörðun, þrátt fyrir breyttar forsendur og vilja þjóðarinnar. Fultrúar hverra eru þið?

Ásýnd einnar fallegustu byggingar borgarinnar mun hverfa. Gamli spítalinn hefur tekið fallega á móti fólki sem er að koma í miðbæinn. Líklega mun sjónás að Háskóla Íslands einnig skerðast.

Meðan á framkvæmdum við Hringbraut stendur er mikill hávaði og ónæði. Margir starfsmenn hafa kvartað og sjúklingar jafnvel útskrifað sjálfa sig, þeir höfðu ekki heilsu til að vera lengur! Framkvæmdir við Hringbraut eiga eftir að taka miklu lengri tíma því það þarf að taka tillit til fólksins.

Það er dálítið öfugsnúið að hafa heilbrigðisþjónustu fyrir sjúklinga í gömlum, mygluðum, heilsuspillandi byggingum. Meira að segja heilbrigt starsfólk hefur orðið veikt við það að vinna þar!

Á Hringbrautinni er þegar umferðarteppa á morgnana og um eftirmiðdaginn. Ekki minnkar hún við það þegar bílar frá öllum 17 vinnustöðum Landspítalans koma saman! Erfitt verður fyrir sjúkrabíla að komast leiðar sinnar, þegar jafnvel sekúndur geta skipt máli og um líf að tefla. Mengun verður mikil og ónæði frá umferð, og ef biðstöð Strætó verður færð frá Hlemmi að BSÍ þá mun það aukast enn meira. Þá mun ekki verða fýsilegt að lofta út eða sofa við opinn glugga. Það er ekki raunhæft að ætla það að flestir munu hjóla eða taka strætó, hvort sem það er starfsfólk eða sjúklingar.

Rannsóknarstofan er strax of lítil, áður en hún er byggð! Þar munu vera rándýr og viðkvæm tæki sem munu leika á reiðiskjálfi, því að ofan á henni verður þyrlupallur, sem margur hefur einnig lýst yfir áhyggjum af vegna slysahættu og erfiðra aðstæðna.

Fólk mun áfram þurfa að liggja á göngum, líka á nýja spítalanum! Því legurýmum fjölgar ekki. Öldruðum er að fjölga (vitað lengi). Það þarf því fleiri hjúkrunarheimili til að taka við þeim þegar þeir hafa lokið meðferð á spítalanum, ef þeir geta ekki farið heim. Þeir munu annars fljótlega teppa einnig sjúkrahótelið.

Mikið af rúmmetrum byggingamagnsins mun fara í langa ganga og tengingar. Það á svo að nota vélmenni til að flytja vörur á milli, en varla sjúklinga!

Er örugglega endilega best að hafa allt á einum stað?

Hefði e.t.v. verið betra að ekki loka st. Jósefsspítala? Því þá bættust margar aðgerðir við biðlistann á Landspítalanum. Hann verður bara lengri og lengri, eðlilega við þessa og fleiri lokanir, t.d. úti á landi.

Að byggja nýtt við gamla spítalann er bútasaumur sem dugar ekki lengi og dýrara þegar upp er staðið. Er það ekki þess virði að bíða aðeins lengur, ef það verður til þess að við fáum þá betri spítala fyrir famtíðina, en ekki bara nokkur ár? Eða ætlum við þá að byggja þennan spítala sem allir vilja, sem sagt byggja hann tvisvar?

Ég skora á stjórnvöld að endurskoða hvar besta staðsetningin er fyrir nýjan Landspítala og hefjast svo handa af fullum krafti annars staðar. En ekki bara æða áfram án þess að hlusta á varnarorð. Ekki viljum við aðra Landeyjahöfn?

Ég skora á alla að mæta í Háskólabíó og láta sér þetta mikilvæga málefni varða, það snertir alla landsmenn.