Kærleikur myndast á milli ókunnugra

Íslendingar sem búsettir eru í Brussel segja borgarbúa hafa haldið ró sinni í kjölfar voðaverkanna í dag. Mikilvægt sé að atburðir dagsins verði ekki vatn á myllu þeirra sem vilji sporna gegn komu flóttamanna til Evrópu, segir Lára Jónasdóttir hjá Læknum án landamæra í Brussel.

 

Samkvæmt upplýsingum frá Utanríkisráðuneytinu eru engar vísbendingar um að Íslendingar hafi verið meðal þeirra sem slösuðust eða létu lífið í Brussel fyrr í dag.

Gunnar Bragi Sveinsson, utanríkisráðherra, hefur hvatt alla íslenska ríkisborgara þar í borg til að hafa samband við ættinga sína. Einnig hefur fólk verið kvatt til að nota samskiptamiðla til að láta vita af sér.

Þeir Íslendingar sem búsettir eru í Brussel og fréttastofa ræddi við í dag voru sammála um að borgarbúar hefðu haldið ró sinni í kjölfar voðaverkanna.

„Fólki er auðvitað brugðið en það halda allir ró sinni finnst mér,“ segir Inga Helga Jónsdóttir, lögfræðingur hjá ESA / Eftirlitsstofnun EFTA í Brussel.

„Það er búið að gefa grænt ljós á að fólk fari á milli staða. Fólk má sækja börnin sín í leikskóla og fara óhindrað leiðar sinnar. En fólk er samt hvatt til að vera á varðbergi. Vonandi á fólk áfram eftir að gera það sem það er vant að gera. Annars hafa þessir hræðilegu menn sem standa á bakvið þetta unnið ansi stóran sigur ef fólk ætlar að fara að breyta venjum sínum eftir daginn í dag.“

Undir þetta tekur Lára Jónasdóttir, starfsmaður Lækna án landamæra í Brussel. Hún  segist óttast að atburðir dagsins verði vatn á myllu þeirra sem vilji sporna gegn komu flóttamanna til Evrópu. Nú skipti máli að standa saman.

„Og vera ennþá sterkari og sýna öllum íbúum jarðarinnar samhug,“ segir Lára.

„Við erum vön að vinna á átakasvæðum. Fólkið sem ég vinn með er vant að vera í Afghanistan og Kongó til dæmis en það er öðruvísi þegar svona hlutir gerast á svæði sem þessu. Við áttum engan vegin von á þessu. Ég var líka í Osló árið 2011 og ég finn fyrir sömu tilfinningum. Það eru allir mjög meðvitaðir um fjölskyldu sína og vini. Það myndast vinátta á milli allra í húsinu og maður talar við fólk sem maður hefur aldrei talað við áður. Allir spyrja fregna af ættingjum hvors annars og svo framvegis. Það myndast ákveðinn kærleikur á milli ókunnugra."

Belgíska lögreglan hefur fundið sprengju, meðal annars með nöglum, í áhlaupi á íbúð í Schaarbeek-hverfinu í Brussel. Þá fundust einnig efni til sprengjugerðar í íbúðinni auk fána Íslamska ríkisins.