Skjálftahrinan tengist niðurdælingu frá Hellisheiðarvirkjun

Yfirferð jarðvísindafólks Veðurstofu Íslands gefur til kynna að skjálftahrina við Húsmúla síðustu daga tengist niðurdælingu frá Hellisheiðarvirkjun. Niðurdælingin er stöðu og jöfn en þó kunna spennubreytingar í jarðskorpunni á svæðinu að hafa breytt áhrifum niðurdælingarinnar.

Vísinda- og tæknifólk hjá Orku náttúrunnar og  Orkuveitu Reykjavíkur mun fara yfir þessar niðurstöður sérfræðinga Veðurstofunnar með þeim ásamt fleiri vísindamönnum. Reynt verður að finna út hvort ástæða er til breytinga á verklagi við niðurdælingu og þá hvaða breytinga sé krafist. Niðurdælingu hefur verið haldið stöðugri frá því áður en hrinan hófst. Snöggar breytingar á henni geta valdið skjálftum. Þetta kemur fram í frétt á vef Orku náttúrunnar.

Frá því að Hellisheiðarvirkjun var tekin í notkun árið 2006 hefur vinnsluvatni frá virkjuninni verið dælt niður í jarðhitageymi. Dælt er niður á tveimur stöðum, við Gráuhnúka og Húsmúla. Um 700-800 lítrum er dælt niður á sekúndu.

Árið 2011 urðu gikkskjálftar við Húsmúla, en þá hafði vatnið virkað eins og smurning og losað um spennu í jarðlögunum. Í kjölfarið var tekið upp verkleg um að forðast snöggar breytingar á högun niðurdælingar og að láta almenning og yfirvöld vita fyrir fram þegar breytingar væru gerðar á niðurdælingu.