Ekki von á niðurskurði í Reykjanesbæ: „Við erum ekki hér til þess að skera niður þjónustu við íbúana“

Bæjarstjórn Reykjanesbæjar hefur óskað eftir frekari fresti til að taka afstöðu til tillögu um að bæjarfélaginu verði skipuð fjárhaldsstjórn. Forseti bæjarstjórnar segir að ekki sé von á niðurskurði í sveitarfélaginu enda hafi meirihlutinn ekki verið kosinn til þess að skera niður þjónustu við íbúa.

Reykjanesbær hefur um langt skeið verið í viðræðum við kröfuhafa sína um mögulega niðurfærslu skulda en sveitarfélagið skuldar kröfuhöfum rúma 40 milljarða króna. Eftirlitsnefnd með fjármálum sveitarfélaga veitti bæjaryfirvöldum í Reykjanesbæ frest til dagsins í dag til að taka afstöðu til tillögu nefndarinnar um að bæjarfélaginu verði skipuð fjárhaldsstjórn en bæjarstjórn Reykjanesbæjar óskaði í síðasta mánuði eftir frest þar sem viðræður við kröfuhafa stæðu enn yfir.

Guðbrandur Einarsson, forseti bæjarstjórnar Reykjanesbæjar, segir að ekki sé von á niðurstöðu í þeim viðræðum í dag. Sveitarfélagið hafi aftur óskað eftir lengri fresti, eða fram í september.

„Það hafa komið fram ýmis atriði í þessum viðræðum sem vert er að skoða betur. Við höfum þess vegna óskað eftir lengri fresti og við vonumst eftir að fá hann,“ segir Guðbrandur.

Fyrst þið farið fram á lengri frest má þá gera ráð fyrir að þessar viðræður gangi ágætlega?

„Við getum sagt að það hafi gefið okkur von núna að það sé möguleiki á að landa þessu án aðkomu fjárhagsstjórnar. Við viljum láta reyna á það til enda,“ segir Guðbrandur.

Guðbrandur segir sveitarfélagið nú vinna að svokallaðri aðlögunarskýrslu til eftirlitsnefndarinnar. Einnig sé unnið að fjárhagsáætlun fyrir sveitarfélagið fyrir næsta ár, ekki sé gert ráð fyrir niðurskurði á þjónustu.

„Við gerum ekki ráð fyrir því. Við erum ekki hér til þess að skera niður þjónustu við íbúana. Við vorum kosin til þess að gera eitthvað allt annað. Við erum að vinna samkvæmt því og þetta byggir á að við náum samkomulagi um einhversskonar niðurfærslu. Við ætlum að halda áfram að vinna á þeim nótum.“