Sumarið er tíminn!

Helga Ingólfsdóttir skrifar 4. ágúst 2016 10:43

Það er alltaf gott að vera íslendingur en í sumar hefur það verið frábært. Allt samfélagið hefur verið á snúningi frá því í vor þegar undirbúningur fyrir forsetakosningar hófst með tilheyrandi kynningum og auglýsingum. Frambjóðendur stóðu sig allir með sóma en fyrir lá að aðeins einn myndi „vinna“ og nú þegar niðurstaða liggur fyrir eru allri sáttir enda Guðni Th prýðismaður í alla staði og verður landi og þjóð til sóma.

Það var vel til fundið hjá nýkjörnum forseta Guðna Th Jóhannessyni og eiginkonu hans Elizu Reid að velja Sólheima í Grímsnesi sem fyrsta viðkomustað en staðurinn er einstakur og ber því fagurt vitni hvernig hugsjónafólk getur með elju sinni komið stórkostlegum hlutum til leiðar.

EM seinkaði ferðasumri landans enda einstaklega skemmtilegt að fylgjast með gangi íslenska liðsins sem „vann“ Portúgal með jafntefli og það var bara byrjunin að þvílíkri fótboltaveislu að aldrei hefur annað eins sést á skjánum og undirrituð horfði á alla leikina og er ekki sú eina sem tók upp þennan nýja sið enda ekki annað hægt að hrífast með góðu gengi íslenska landsliðsins.

Íslendingar hafa samt verið duglegir að ferðast innanlands enda einmuna veðurblíða að minnsta kosti hér sunnanlands. Útihátíðir um allt land eru vel sóttar og þjóðhátíð í Eyjum var sú fjölmennasta fram að þessu og fór vel fram að mestu leyti. Um helgina verða fiskidagar á Dalvík og reiknað er með að margir leggi leið sína þangað til að bragða á fiskisúpu heimamanna og fleira góðgæti.

Og sumarið er ekki búið, berjaspretta lofar góðu um allt land og tilvalið fyrir fjölskylduna að skella sér í berjamó. Íslensk ber eru ómenguð náttúruafurð, stútfull af andoxunarefnum og hvað er betra en að eiga í ber í frysti þegar skammdegið skellur á? Sveppamó er ennfremur hin besta skemmtun fyrir og ekki flókið að læra um helstu matsveppina okkar.

Með haustinu koma svo ný verkefni en framundan er val fulltrúa á framboðslista vegna Alþingiskosninga sem fyrirhugðað er að verði í haust. Misjafnt er með hvaða hætti flokkarnir velja sína fulltrúa, ýmist með prófkjörum, forvali eða öðrum hætti. Facebook mun spila stórt hlutverk í kynningum allra frambjóðenda enda sá miðill sem nær til flestra á skemmstum tíma með minnstum tilkostnaði. Á kjósendum hvílir sú ábyrgð að kynna sér vel frambjóðendur og nýta rétt sinn til þess að velja á lista viðkomandi flokka í samræmi við þær aðferðir sem í boði eru.