Dominos körfuboltakvöld snýr aftur

Domino's körfuboltakvöld verður áfram á dagskrá Stöðvar 2 Sport í vetur en ljóst er að það er frábært tímabil fram undan í körfunni.

Kjartan Atli Kjartansson mun áfram stýra þættinum í vetur en hann hóf göngu sína fyrir ári síðan og er óhætt að segja að þátturinn hafi slegið í gegn.

Fannar Ólafsson, Jón Halldór Eðvaldsson, Hermann Hauksson og Kristinn Geir Friðriksson verða áfram sérfræðingar þáttarins.

KR er ríkjandi Íslandsmeistari og líklegt að vesturbæingar verði áfram í titilbaráttunni í vetur, ekki síst eftir að félagið gekk frá samningum við Jón Arnór Stefánsson.

Þá er Hlynur Bæringsson sagður á leið í íslenska körfuboltann á nýjan leik en hann hefur einnig verið orðaður við KR.

Strákarnir í Körfuboltakvöldi hafa minnt á sig með þessari frábæru stiklu sem má sjá í spilaranum hér fyrir ofan.