Skrokkalda og neðri hluti Þjórsár í nýtingarflokk

Drög að tillögum verkefnisstjórnar um rammaáætlun voru kynnt í dag og fara sjö virkjunarkostir á fimm svæðum í orkunýtingarflokk samkvæmt þeim. Svæðin sem um ræðir eru Skrokkalda, Þjórsá, Krýsuvíkursvæði, Hengilssvæði og Blöndulundur.

Virkjunarkostirnir eru Skrokkölduvirkjun, Holtavirkjun og Urriðafossvirkjun í Þjórsá, Austurengjar á Krýsuvíkursvæði, Hverahlíð II og Þverárdalur á Hengilssvæði og svo Blöndulundur.

Í verndarflokk fara fjórir virkjunarkostir í Héraðsvötnum, aðrir fjórir í Skjálfandafljóti, einn virkjunarkostur í Skaftá og einn í Þjórsá – vestur.

Í biðflokk fara svo tveir virkjunarkostir í Hólmsá og svo einn virkjunarkostur á eftirfarandi stöðum: Hvítá, Hagavatn, Stóra-Laxá, Austurgil, Krísuvíkursvæði, Hengilssvæði, Hágöngur, Fremrinámar og Búrfellslundur.

Umsagnarferli um tillögur verkefnisstjórnarinnar um flokkun virkjunarkosta hefst þann 11. maí næstkomandi. Það stendur í 12 vikur eða til og með 3. ágúst. Eftir það mun verkefnisstjórnin ganga frá endanlegum tillögum sínum til ráðherra og afhenda þær þann 1. september.

Kynningarfund vegna rammaáætlunar má sjá í heild sinni hér að neðan en athugið að virkja þarf Silverlight-tengiforrit og að útsendingin virkar ekki í Chrome-vafranum. Þá má sjá skýrslu verkefnisstjórnar í heild sinni hér.