Íbúi á Ásvallagötu hljóp uppi innbrotsþjóf sem braust inn í Kjötborg

„Það er gott að hafa góða granna,“ segir Gunnar Jónasson, annar af eigendum verslunarinnar Kjötborgar, um íbúa sem hljóp uppi innbrotsþjóf sem hafði brotist inn í verslunina við Ásvallagötu síðastliðið föstudagskvöld. Atvikið átti sér stað rétt fyrir miðnætti en íbúinn var í makindum heima hjá sér þegar hann varð var við brothljóð.

Þegar út var komið sá hann hvernig búið er að brjóta rúðu í húsnæði Kjötborgar og sér tvo einstaklinga hlaupa frá vettvangi. Við nánari eftirgrennslan sér hann þriðja manninn inni í versluninni og hefur íbúinn samstundis samband við lögregluna á höfuðborgarsvæðinu.

Samkvæmt heimildum Vísis tilkynnti innbrotsþjófurinn íbúanum að það væri honum fyrir bestu að hafa ekki hátt um þetta mál. Íbúinn svaraði innbrotsþjófunum að hann væri með lögregluna á línunni og tók þá sá síðarnefndi til fótanna.

Íbúinn veitti þremenningunum eftirför eftir Ásvallagötunni. Skömmu síðar voru lögreglumenn mættir á vettvang á benti íbúinn þeim í þá átt sem mennirnir hlupu og hafði lögreglan hendur í hári þeirra.

Gunnar segir tjónið af þessu innbrotið smávægilegt fyrir Kjötborg, einungis rúðan sem var brotin. Þjófurinn hafði á brott með sér sígarettur og skiptimynt sem Kjötborg endurheimti. Gunnar segir þjófinn hafa skorið sig á glerbroti við innbrotið en hann fékk aðhlynningu frá lækni.