Ákvörðun Merkel vekur blendin viðbrögð

Ákvörðun Þýskalandskanslara að setja sig ekki upp á móti mögulegri lögsókn á hendur þýskum grínista hefur vakið blendin viðbrögð þar í landi það sem af er degi.

Grínistinn, Jan Böhmermann, á allt að fimm ára fangelsi yfir höfði sér fyrir að móðga Recep Tayyip Erdogan, forseta Tyrklands. Grínið var í formi ljóðs sem hann las í þætti sínum Neo Magazin Royale 31 mars síðastliðinn. Það fjallaði meðal annars um kynlíf með geitum og kindum auk kúgunar minnihlutahópa í Tyrklandi.

Merkel blés til blaðamannafundar í gær með stuttum fyrirvara til að tilkynna að ríkisstjórn hennar myndi verða við beiðni tyrkneskra stjórnvalda um að kanna möguleikann á lögsókn á hendur Böhermann.

Sjá einnig: Grínisti fór í felur vegna hótana

Stjórnmálaskýrendur hafa skiptst í tvær fylkingar. Sumir hafa sagt ákvörðun Angelu Merkel til marks um að hún treysti dómstólum landsins á meðan aðrir telja hana til marks um undirgefni við Tyrklandsforseta.

Samkvæmt þýskum hegningarlögum er refsivert að móðga erlendan þjóðhöfðingja. Sambærilegt ákvæði er enn í íslenskum hegningarlögum. Talið er að kanslarinn vilji samt ekki fá Erdogan upp á móti sér, nú þegar Tyrkir hafa fallist á að leysa að hluta þann flóttamannavanda sem Evrópuríki hafa sárlega kveinkað sér undan.

Leiðarahöfundur dagblaðsins Die Welt fór hörðum orðum um ákvörðun Merkel og sagði að kanslaratíð Merkel muni ætíð bera þess merki verði Böhmerann dæmdur fyrir grín sitt.

Berthold Kohler hjá dagblaðinu Frankfurter Allgemeine Zeitung var á öðru máli í pistli sínum í morgun. „Ólíkt því sem þekkist í Rússland og Tyrklandi þarf saklaust fólk ekki að óttast lögin í þessu landi. Mál Böhmermann er í höndum sjálfstæðra dómara.“

Í færslu á Facebook-síðu sinni sagði grínistinn hafa fundið fyrir miklum stuðningi síðustu daga - „frá meirihluta þeirra sem eru ekki Erdogan forseti.“ Færslu hans má sjá hér að neðan.