Írakar sækja fram gegn ISIS við Fallujah

Íraski herinn og vopnaðar sveitir sjíta sækja fram gegn vígamönnum Íslamska ríkisins við Fallujah. Borgin er ein af tveimur stórum borgum sem ISIS stjórnar í Írak. Nærliggjandi bær sem heitir Karma er nú í haldi hersins. ISIS-liðar felldu hermenn í sjálfsmorðsárás norður af borginni, en gagnárás þeirra var sigruð með hjálp þyrlna.

Þrátt fyrir að Karma sé nú laus við vígamenn ISIS og í haldi stjórnvalda, segir blaðamaður BBC að bærinn sé nánast rústir einar og þar sé enga almenna borgara að sjá.

Enn eru um 50 þúsund almennir borgarar í Fallujah, en þeim hefur verið skipað að flýja og/eða setja hvít lök á þök húsa sinna. Sameinuðu þjóðirnar segjast hafa fengið fregnir af því að almennir borgarar hafi dáið úr hungri í Fallujah og fólk hafi jafnvel verið myrt fyrir að neita að berjast fyrir ISIS.

Herinn undirbýr nú sókn á borgina sjálfa en ekki liggur fyrir hvenær af henni verður.