Kvarta yfir gagnslausu amfetamíni

Sex kvartanir hafa borist Lyfjastofnun á síðustu tveimur mánuðum vegna amfetamíns sem framleitt er hér á landi og er sagt ekki virka. Lyfjaframleiðandinn er Pharmarctica á Grenivík.

Amfetamínið er gefið sjúklingum sem glíma við þunglyndi, slen og drómasýki. Einnig fá langt leiddir fíklar það uppáskrifað til að forðast efni af götunni. Það er lítill hópur eldri manna sem fyrst og fremst fær lyfið ávísað hér á landi.

Samkvæmt heimildum Fréttablaðsins er tiltölulega stutt síðan Pharmarctica tók við framleiðslunni, en áður hafði hún verið í höndum annarra lyfjaframleiðenda. Strax og lyfið fór í framleiðslu hjá fyrirtækinu fór kvörtunum að rigna inn frá sjúklingum sem allir segja að lyfið hafi engin áhrif.

Sigríður Ólafsdóttir, sviðsstjóri eftirlitssviðs hjá Lyfjastofnun, staðfestir að stofnunin hafi kallað eftir niðurstöðum gæðamælinga á lyfinu en ekkert í þeim bendi til þess að lyfið sé gallað. Þrátt fyrir það hafi Lyfjastofnun farið fram á að gerðar verði gæðamælingar á sýnum sem farið hafi á markað. Niðurstöður liggja fyrir innan tíðar.

Sigurbjörn Þór Jakobsson, framkvæmdastjóri Pharmarctica, vildi ekki tjá sig um málið þegar eftir því var leitað.