Pissaði á morgunkorn Kelloggs: „Neytendur á Íslandi þurfa ekki að hafa neinar áhyggjur“

Enginn möguleiki er á því að íslenskir neytendur hafi keypt vörur hér á landi úr verksmiðju Kellogg‘s í Bandaríkjunum þar sem starfsmaður pissaði á eitt færiband verksmiðjunnar. Þetta kemur fram í fréttatilkynningu frá Nóa Síríus sem er dreifingaraðili Kellogg‘s á Íslandi.

Í tilkynningunni segir að allar vörur sem fluttar eru hingað til lands séu keyptar frá Bretlandi. Vörurnar séu framleiddar í því landi og er hæstu gæðastuðlum fylgt við framleiðsluna.

„Þetta er auðvitað grafalvarlegt mál fyrir vörumerkið Kellogg´s en neytendur á Íslandi þurfa ekki að hafa neinar áhyggjur af því að þeir hafi keypt vörur eða muni kaupa vörur úr umræddri verksmiðju“, er haft eftir Kristjáni Geir Gunnarssyni, framkvæmdastjóra sölu- og markaðssviðs Nóa Síríus, í tilkynningunni.

Sakamálarannsókn er hafin í Bandaríkjunum í kjölfar þess að myndband birtist af starfsmanninum að pissa á færiband verksmiðjunnar. Í yfirlýsingu frá Kellogg‘s vegna málsins kom fram að félagið hafi frétt af myndbandinu á föstudag og í kjölfarið látið lögreglu og matvælaeftirlit vita.