Bresk kona banaði þriggja ára syni sínum við æfingaakstur

Þriggja ára breskur drengur lést eftir að hafa orðið fyrir bíl þar sem móðir hans var við æfingaakstur.

Hin 34 ára Lyndsay Turner var í fyrsta sinn undir stýri þegar hún ók á son sinn Liam í júní á síðasta ári.

Sky News greinir frá málinu en réttarmeinafræðingar í Norwich hafa haft málið til meðferðar að undanförnu.

Turner segir í yfirlýsingu að hún hafi verið að aka bílnum inn á bílastæði nærri heimili fjölskyldunnar í Watton í Norfolk þar sem eiginmaður hennar var að kenna henni á bílinn.

Liam var að leik með eldri systur sinni þegar móðir hans steig fyrir mistök á bensíngjöfina og bíllinn kipptist áfram og á Liam.

Stephen Turner, eiginmaður Lyndsay, var ekki inni í bílnum heldur stóð fyrir utan og fylgdist með henni þar sem hún æfði sig. Hann dró svo Liam undan bílnum og ók með hann í átt að sjúkrahúsi, en stöðvaði svo sjúkrabíl sem varð á vegi hans. Liam lést á sjúkrahúsinu skömmu síðar af völdum heilaskaða.

Þrátt fyrir að Lyndsay hafi verið akandi á almenningsvegi, án ökuskírteinis og án tryggingar, þá segir saksóknaraembættið að það þjóni ekki hagsmunum almennings að ákæra Turner í málinu.