Desemberspá Siggu Kling - Hrúturinn: Þú þarft að hreyfa þig reglulega elskan mín

Elsku hrúturinn minn. Tíminn líður svo rosalega hratt og mér sýnist þú vera á meiri hraða en flestir. Þér finnst eins og síðustu jól hafi bara verið í gær. En allt mun þetta þó smella saman, og þú verður tilbúin með það sem vantar 20. desember svo farðu bara að hlakka til. Ekki hanga með hugann í framtíðinni, því þá finnur þú fyrir þessari rosalegu þreytu.

En þú þarft að hreyfa þig reglulega elskan mín, ég á erfitt með að segja þér þetta en það róar bæði huga og sál og þá færðu meiri kraft til að redda hlutunum. Ef þú ert í erfiðu sambandi eða á lausu skaltu vara þig á því að gera eitthvað sem þú sérð eftir, hvatvísi er ríkjandi. En stundum þarft þú jafnvel að hugsa áður en þú framkvæmir. Tilfinningaorkan þín er mjög mikil, og þér finnst að allir ættu að vera samferða þér í þessum krafti.

Það hafa bara ekki allir sama úthald og þú en þeir eru góðir í einhverju öðru svo lærðu að meta það. Einn af þínum kostum er að þú skynjar hættu betur en aðrir. Og þú kemst fram hjá erfiðleikum með undraverðum hætti. Þú hefur mikla hæfileika og ástríðu og þú elskar svo einlægt og sterkt. Þú ert í eðli þínu verndari en þú tekur það of nærri þér þegar þú getur ekki bjargað öllum, samt er alls ekki hægt að tjóðra þig niður og skipa þér fyrir verkum, þá verður þú eins og naut í flagi.

Ef þér finnst þetta að einhverju leyti verður þú að rífa þig lausan og fara þínar leiðir, hvort sem það er í sambandi við ást, vináttu eða verkefni. Því fyrr sem þú áttar þig á þessu, þeim mun skemmtilegra verður lífið. Þú ert að fara inn í nýtt upphaf eftir 3 mánuði, svo núna ertu að skipuleggja og finna út hver þú ert í raun og veru. Þessir mánuðir sem eru fram undan hreinsa út neikvæða orku, efla sjálfstæði þitt og fólk í kringum þig á eftir að sjá á þér nýja hlið.

Mottó: Að hika er sama og að tapa. Ást og knús Sigga Kling

Frægir Hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir pírati, Anna Svava Knútsdóttir leikkona, Ólöf Erla, grafískur hönnunarsnillingur, Elton John söngvari, Salka Sól súperdrottning, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, söngkona AmabAdamA, Þórhallur Þórhallsson uppistandari, Kristín Þorsteinsdóttir, aðalritstjóri 365 miðla, Alda í Handy pandy, naglalistakona,  Vala Grand, Hjálmar Forni listamaður.