Íslensk heimili í liði með sýrlenskum börnum

Brátt göngum við inn í hátíð ljóss og friðar þar sem náungakærleikurinn er allsráðandi. Hverjar sem aðstæður okkar Íslendinga eru getum við með nokkurri vissu horft til ársins 2017 og séð fram á frið. Líkurnar á að stríð brjótist út á Íslandi eru litlar og við getum verið nokkuð viss um að helstu ráðamenn landsins, sama í hvaða stjórnmálaflokki þeir eru, munu ekki ráðast á sína eigin þjóð með ofbeldi.

Á flótta daginn eftir fæðingu

Ef ég tala fyrir sjálfa mig munu hátíðahöldin í ár bera keim af hörmungum annarrar þjóðar. Heimsbyggðin horfir lömuð á meðan Sýrlendingar þjást. Ofbeldið virðist aukast með hverjum deginum þar sem saklaus börn eru helstu fórnarlömbin. Þegar ég gæði mér á jólasteikinni umvafin fjölskyldumeðlimum mun hugurinn án efa reika til Sýrlands og barnanna þar sem eru ein á flótta eða hafa misst heimili sín. Ég mun horfa á börnin mín og hugsa til þriggja barna móður sem flúði sprengingarnar í Aleppo á dögunum. Yngsta barnið var aðeins eins dags gamalt og það elsta sjö ára. Fjölskyldan náði loksins í neyðarskýli SOS Barnaþorpanna þar sem miðjubarnið, tveggja ára stúlka, leið út af vegna næringarskorts.

SOS Barnaþorpin hafa starfað í Sýrlandi í tæp fjörutíu ár og voru því viðbúin þegar stríðið hófst. Eins viðbúin og hægt var í það minnsta. Samtökin hafa síðan þá starfað í þágu barna í landinu þrátt fyrir erfiðar aðstæður. Eins og alltaf leggja SOS Barnaþorpin áherslu á aðstoð við börn en neyðar­aðstoð samtakanna felst meðal annars í heitum máltíðum, þurrmjólk, hlýjum fatnaði, barnvænum svæðum og drykkjarvatni. Tugir þúsunda barna hafa fengið aðstoð frá SOS síðan stríðið hófst. Það sem SOS Barnaþorpin leggja þó mesta áherslu á er að útvega munaðarlausum og yfirgefnum börnum heimili og fjölskyldu en sem stendur eru SOS einu hjálparsamtökin í Sýrlandi sem það gera. Nú í desember var opnað nýtt SOS Barnaþorp í Damaskus þar sem pláss er fyrir 150 börn. Alls eru þrjú barnaþorp í Sýrlandi fyrir tæplega 500 börn sem öll eiga það sameiginlegt að hafa orðið viðskila við eða misst foreldra sína.

Ljósi punkturinn í sýrlenska svartnættinu er sá að starfsmenn SOS Barnaþorpanna (ásamt öðrum hjálpar­samtökum) gera allt sem í þeirra valdi stendur til að verja réttindi barnanna í landinu og hafa bjargað mörgum mannslífum. Íslendingar standa líka með sýrlenskum börnum en á næsta ári munu mánaðarlegir styrktaraðilar SOS á Íslandi senda fimmtán milljónir til Sýrlands. Fimmtán milljónir frá íslenskum heimilum sem hafa ákveðið að verja sýrlensk börn. Og þá teljum við ekki með alla þá sem munu styrkja neyðaraðstoð SOS í Sýrlandi. En það er sama hvað við gerum, hvað við reynum að slökkva marga elda og hversu mörg börn fá nýjar fjölskyldur í SOS Barnaþorpi, þá er aldrei hægt að hjálpa öllum. Því miður.

Hugur minn verður hjá sýrlenskum börnum um jólin og ég óska þess innilega að hörmungunum ljúki árið 2017.

Þessi grein birtist fyrst í Fréttablaðinu.