Faðir Einars Arnar: „Gætir þú fyrirgefið einhverjum manni sem hefði myrt barnið þitt?“

Faðir Einars Arnar Birgissonar segir ekki tímabært að morðingi sonar hans endurheimti málflutningsréttindi sín. Gera þurfi greinarmun á alvarleika brota í því samhengi. Fjölskylda Einars mun á næstunni senda yfirlýsingu til lögmannafélagsins þar sem þau ætla að lýsa áhyggjum sínum af málinu.

Kastljós greindi frá því í gærkvöldi að Atla Helgasyni hefði verið veitt uppreist æru af innanríkisráðuneytinu. Hann var dæmdur í sextán ára fangelsi árið 2001 fyrir morðið á Einari Erni Birgissyni og sat inni í tíu ár. Hann hefur síðan þá starfað á lögmannstofu í Kópavogi en  sækir nú um að fá málfutningsréttindi sín aftur.

„Maður skilur það vel að sumir ná að fara í fangelsi og ná að verða betri menn og til þess er ætlast,“ segir Birgir Örn Birgisson, faðir Einars Arnar. „En ég sé ekki að það sé kominn tími á að hann fái þessi réttindi nú þegar. Mér finnst þetta ekki tímabært. Þó ég sé ekki kunnugur lögum í þessum málum, þá finnst mér að það þurfi að gera greinarmun á alvarleika málanna.“

Fjölskyldan efast um að Atli uppfylli kröfur til að endurheimta málflutningsréttindi. Þau munu á næstu dögum senda bréf til lögmannafélagsins vegna málsins.

„Þegar við heyrðum viðtal við formann Lögmannafélagsins í gær, þá kom fram að Atli hefði þurft að uppfylla ákveðin skilyrði til þess að þeir myndu samþykkja hann aftur,“ segir Birgir Örn. „Við teljum að enginn þeirra punkta sem þar komu fram eigi við. Við sjáum ekki í fljótu bragði að þetta sé að fara að ganga einn, tveir og þrír.“

Málið er eitt umtalaðasta sakamál síðari ára og vakti mikinn óhug, meðal annars vegna þess að Atli tók virkan þátt í leitinni að Einari og mætti í minningarathöfn um hann áður en hann játaði að hafa orðið honum að bana.

Hafið þið fyrirgefið honum?

„Ekki ég og ég á ekki von á því að börnin mín hafi fyrirgefið honum neitt,“ segir Birgir Örn. „Ég vil samt taka það skýrt fram að við erum ekki að þjást af verulegri heift eða reiði. Við erum að reyna að horfa skynsamlega á málin en ég myndi bara spyrja til baka, gætir þú fyrirgefið einhverjum manni sem hefði myrt barnið þitt?“