Haukur Helgi og félagar hringdu inn jólin með sigri

Haukur Helgi Pálsson og félagar í franska B-deildarliðinu Rouen hringdu inn jólin með fjögurra stiga sigri, 79-83, á Boulogne-sur-Mer í kvöld.

Þetta var aðeins þriðji sigur Rouen í vetur en liðið vermir botnsæti deildarinnar.

Haukur Helgi og félagar voru sjö stigum undir fyrir lokafjórðunginn en tryggðu sér sigurinn með því að vinna hann 22-11.

Haukur Helgi spilaði í 35 mínútur í leiknum í kvöld og stóð fyrir sínu. Landsliðsmaðurinn skoraði sjö stig, tók sex fráköst og gaf fjórar stoðsendingar.

Næsti leikur Rouen er gegn Ada Blois 27. desember.