Flugeldasalinn Örn Árnason lætur 200 kr af hverri seldri köku renna til Ljóssins

Nú fara flugeldasölurnar á fullt í dag og margt virðist vera í boði. Einkaaðilar hafa látið til sín taka í sölunni líkt og Vísir hefur greint frá. Einn þeirra er bomba.is en þjóðþekkti leikarinn Örn Árnason er einn rekstraraðila þar. Þeir settu sig í samband við Ljósið endurhæfingar-og stuðningsmiðstöð fyrir krabbameinsveika og ætla að láta gott af sér leiða.

„Við sem stöndum að Bombu höfum verið að styrkja ýmis konar starfsemi á borð við Fjölskylduhjálpina og við höfum ekki verið að láta það uppi hvað það hefur verið fyrr en núna.“ segir Örn og nefnir að Ljósið sé að vinna svo gott starf og því vilji þeir beina styrknum þangað. Örn nefnir að þeir hafi einnig stutt við einstaklinga sem hafi átt erfitt og hafi jafnvel lent í slysum. Hann bætir við að það fari 200 kr af hverri seldri tertu beint til þeirra og þeir muni einnig bæta við upphæðina.

Þannig má sjá að af dýrustu tertunni sem kostar 59.900 kr renna 0,3 prósent til Ljóssins en 2 prósent renna til Ljóssins af ódýrustu kökunni sem kostar 9.900 kr.

Verða fyrir smá mótlæti

Aðspurður um stöðu einkaaðila á flugeldamarkaðnum og mótlætið sem á þá herjar m.a. frá stuðningsaðilum björgunarsveitanna segir Örn það ekkert launungarmál að hann telji að björgunarsveitir eigi að vera ríkisreknar.

„Ég hef aldrei farið dult með þá skoðun mína að mér finnst, í svona harðbýlu landi sérstaklega á veturnar, að það eigi að vera til björgunarsveit sem á að vera ríkisrekin að hluta eða að stórum hluta. Mér finnst björgunarsveitir ekki endilega rétti aðilinn til að selja vörur sem geta valdið tjóni.“

Örn segir að þeir hjá Bombu hafi vissulega orðið fyrir smá mótlæti en bendir á að þetta sé lýðræðisríki og frjáls samkeppni á þessum markaði. Þeir vilji gera vel og styrkja gott málefni í leiðinni.

Þakklát fyrir stuðninginn

Erna Magnúsdóttir, forstöðumaður Ljóssins, segir þetta hafa komið sér vel og eru þau þakklát fyrir þessa styrki.

„Hann hringdi og spurði hvort hann mætti styrkja Ljósið í ár og við sögðum já því við vitum að hann er hvort sem er að selja þetta og hann vildi láta gott af sér leiða og við þáðum það.“

Erna leggur samt sem áður áherslu á að þau vilji ekki með þessu skyggja á björgunarsveitirnar þar sem mikilvægt starf fari þar fram en þar sem einkaaðilar séu komnir á markaðinn þá liggi beint við að þiggja aðstoðina fyrst þeir vilji láta gott af sér leiða. Hún nefnir að það sé ekkert formlegt samstarf á milli en þau hafi skiljanlega þegið boðið.

„Þetta var bara fallega hugsað hjá honum,“ bætir Erna við.