Fjöldi bygginga LSH myglu að bráð

Rakaskemmdum og myglutilfellum í húsum Landspítalans er ekki sinnt að fullu vegna fjárskorts að mati Landspítalans. Stjórnvöldum er árlega gerð grein fyrir stöðunni og segja stjórnendur Landspítalans um 1,2 milljarða aukalega þurfa í viðhaldsverkefni á næsta ári.

„Við erum að fá til viðhalds og endurbóta um 850 milljónir króna en fjárþörfin samkvæmt okkar bókum og ítarlegum rannsóknum EFLU verkfræðistofu er um tveir milljarðar til að laga það húsnæði sem er rakaskemmt og með myglu,“ segir Ingólfur Þórisson, framkvæmdastjóri rekstrarsviðs Landspítalans. „Það eru rakaskemmdir víða og mygla í húsum okkar og það er óviðunandi að sjúkrahús þurfi að eiga í slíkum vanda.“

Heildarfjárþörf Landspítalans til viðhalds bygginga er í kringum fimm milljarðar samkvæmt gögnum spítalans. Spítalinn hefur á síðustu árum unnið í viðgerðum á húsum utanhúss til að fyrirbyggja frekari skemmdir af raka. Það hefur verið stefnan síðustu misseri og að sama skapi bíða þá mikilvægar og aðkallandi innanhússviðgerðir.

Fjöldi húsa spítalans er skemmdur af raka eða myglu og því þarf að ganga í það á næstu árum að fyrirbyggja frekari myglu. Sagt hefur verið frá því að um 100 starfsmenn sjúkrahússins hafa verið frá vinnu vegna myglueinkenna.

Spítalinn er til húsa í um eitt hundrað byggingum. Ingólfur telur það mikilvægt að menn geri sér grein fyrir stöðu mála. „Það þarf að fara í framkvæmdir við húsin en vegna fjárskorts höfum við þurft að fresta aðkallandi verkefnum og lengja tímann sem tekur að bæta húsakost okkar. Árlega setjumst við niður með hinu opinbera og gerum grein fyrir stöðunni á húsakostinum,“ segir Ingólfur.

A næsta ári verður 360 milljónum varið til utanhússframkvæmda til að verja hús fyrir rakaskemmdum en aðeins 125 milljónum varið til að gera við mygluð og ónýt hús vegna rakaskemmda.

Fréttin birtist fyrst í Fréttablaðinu.