Desemberspá Siggu Kling - Krabbi: Þitt jákvæða karma mun gefa þér það sem þig vantar

Elsku eldheiti krabbinn minn. Það er svo mikil dásemdardýrð að vera í þessu merki, þið skapið allar skemmtilegu sögurnar og þegar upp er staðið samanstendur líf þitt bara af þeim sögum sem þú getur sagt um sjálfan þig og aðra í kringum þig. Þú ert að sjálfsögðu sögumaðurinn í ævisögu þinni.

Og þegar ég skoða stjörnukortið þitt sé ég að þú ert að fara inn í mánuð þar sem miklar tilfinningar fara í gegnum huga þinn. Þú vilt gera öllum svo gott og gefa svo mikið og þú þarft því að vera viðbúinn að fá ekki það sem þig langar í í staðinn. Þitt jákvæða karma mun gefa þér það sem þig vantar úr annarri átt en þú býst við. Það verða meiri peningar í kringum þig og þeir munu gefa þér orku, enda eru þeir bara orka og þú átt eftir að vera dálítið eyðslusamur, og það er bara allt í lagi.

Þó að þú sért þetta tilfinningamerki þá vilt þú ekki sýna miklar tilfinningar, þú ættir að sleppa meira fram af þér beislinu og sýna fólkinu þitt rétta eðli. Þú átt það til að dulbúa þig með húmor og gleði, þó að þú sért kannski ekki glaður. Ég er alls ekki að biðja þig um að breyta því, en þú þarft að læra að treysta betur, því fólk elskar þig og saknar þín og þetta er akkúrat mánuðurinn sem þú munt nota til að tengja þig við gamla vini, fólk sem þú hefur ekki séð lengi og út úr því mun spretta eitthvað svo dásamlega merkilegt.

Þú ert fyrirmynd mjög margra í kringum þig og átt miklu fleiri aðdáendur en þig grunar. Þú verður alltaf jafn hissa ef einhver hrósar þér og þú átt það til að draga jafnvel úr hrósinu. Þú hefur ekki tíma fyrir neina vitleysu í desember, svo þú skalt ekki rugga ástarbátnum eða búa til vesen, þó að þér finnist þess þurfa.

Þetta á sérstaklega við ykkur sem eruð í sambandi sem er ekki alveg fastmótað og þá sem eru á lausu, þá meina ég að stofna ekki til ástarævintýris sem auðsjáanlega gengur ekki upp. Það er mikilvægt að nota desember til að ná innra jafnvægi, því þú hefur kraft til að gera allt sjálfur og þarft ekki á neinni vitleysu að halda.

Þér verður boðið merkilegt verkefni eða færð spennandi tilboð, sem þú hefur lengi beðið eftir. Þetta gæti allt tekið svolítinn tíma, en vertu bara alveg rólegur því að allt er að gerast á hárréttum tíma.

Mottóið þitt í desember: Ég bið lífið um að leysa þau vandamál sem ég hef ekki tíma til að leysa.

Frægir Krabbar: Bryndís Schram, Sigga Lorange Ostabúðarskvísa, Auddi Blö, sem við elskum öll, Dagur B. Eggertsson, borgarstjóri og dúlla, Ólafur Stefánsson, handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason og Lars Lagerbäck landsliðsþjálfari, Davíð hinn góði skóari í Hafnafirði, Stefán Árni Pálsson fréttamaður, Th. forseti Íslands, Bento veitingakóngur, Friðbjörn Europartakóngur.