Nóvemberspá Siggu Kling – Vogin: Auðmýkt mun koma þér lengra

Elsku besta Vogin mín. Þú ert að byrja tímabil sem varir í 12 mánuði Það er mjög mikilvægt að þú skoðir hvað er að ganga vel þessa stundina því það mun margfalda sig á þessu tímabili. Þú ert á vissum upphafsreit í lífi þínu þótt þú gerir þér ekki alveg grein fyrir því.

Það er miklu meira að fara að gerast heldur en þú hefur hugmynd um. Þú þarft að skoða að trygglyndi er einkunnarorð fyrir þetta tímabil. Vertu eins góð við fólk og þú getur, þótt þú þolir það ekki. Það mun margborga sig. Þú hefur svo opinn og listrænan huga að þú þarft að fá útrás fyrir þann kraft sem þar býr.

Allar hindranir geta gert þig ótrúlega pirraða og þá magnarðu upp reiði sem gæti snúist gegn þér. Teldu upp að 10 áður en þú segir eitthvað sem þú gætir séð eftir. Og mundu að orðið „fyrirgefðu“ er fallegt orð. Auðmýkt mun koma þér lengra en yfirráð! Það fer þér best að vera í föstu sambandi.

Annars skautar þú á milli í vitleysunni og þá hefur þú ekki stjórn. Það er líka allt í lagi að vera þannig að maður þurfi ekki maka til að komast af en þá verðurðu að gera þér grein fyrir því og vera sátt og ánægð með það. Þú átt það til ef þú ert á lausu að vera of eirðarlaus í huganum og ná ekki að vita alveg hvað það er sem gefur þér lífsfyllingu. Lífsfylling er fólgin í litlu hlutunum í kringum þig.

Farðu að taka betur eftir þeim, það gerir þig sterkari. Hvort sem þú ert karl eða kona, hjartað mitt, þá hefurðu frá svo mörgu að segja og hefur þessa frásagnargáfu sem er svo skemmtileg. Þótt þú sért maður, elsku Vogin mín, þá get ég sagt þér að í þér býr kona. Þar af leiðandi heillar þú til þín ólíklegasta fólk og lendir svo oft í atburðarrás sem gefur allt aðra útkomu en þú varst búin að hugsa þér.

Þetta er vegna þess að þú ert með svo opinn huga. Og ert tilbúin að skoða svo margt nýtt að þess vegna er veröldin miklu meiri leikvöllur fyrir þig heldur en flest öll önnur merki. Ekki velta þér upp úr gærdeginum, þú átt það til. Hann mun bara hindra ró dagsins, það er ekki hægt að breyta því sem er búið svo þér þarf að vera svolítið skítsama hvað aðrir eru að röfla í kringum þig.

Þú munt fara hnarreist áfram og enginn mun sjá á þér hvað þú hefur farið í gegnum og það er akkúrat þetta sem gerir þinn x-faktor, því verkefnin í lífi þínu næstu mánuði munu öll leysast betur með þig svona hnarreista, það er lykillinn að þeim sigrum sem þú vilt vinna. Ekki horfa niður, horfðu beint fram, þá sérðu ljósið. Það er skínandi skært og þá mun ekkert stoppa þig.



Frægir í Voginni: Kári Árnason landsliðsmaður, Glúmur Baldvinsson stjórnmálafræðingur, Hjalti flugþjónn, Ingi í Sign, Jón Axel Ólafsson athafnamaður, Matt Damon leikari, Íris Berg, fatahönnuðurinn minn, Mary Poppins, Steingrímur Sævarr Ólafsson fjölmiðlaráðgjafi, Svanhildur Hólm Valsdóttir, aðstoðarmaður ráðherra og sjónvarpskona, Hanna Birna Kristjánsdóttir þingkona, Lilja Dögg Alfreðsdóttir alþingiskona, Ósk Gunnarsdóttir útvarpskona, María Einarsdóttir ritari stjörnuspánnar, Arnþrúður Karlsdóttir útvarp Saga.