Nóvemberspá Siggu Kling – Hrútur: Þú átt ekki að hafa á þér neinn járnaga

Elsku ljúfi Hrúturinn minn. Upphafsorð mín eru yfirleitt elsku sterki Hrúturinn minn en þú þarft ekkert alltaf að vera sterkur. Það eru líka tímabil, eins og núna, sem þú mátt leggjast undir feld og vera latur. Leti getur líka verið sexí. Þú átt ekki að hafa á þér neinn járnaga.

Því það þýðir ekki að þú sért að gefast upp heldur þýðir það að þú þarft ekki að stjórna öllu í kringum þig. Um leið og þú sleppir núna tökunum og lætur þig fljóta með straumnum, þá færðu tilboðin til þín á færibandi. Þú þarft að taka þér oftar frí, því að það er ekki gott að vera ómissandi og það er enginn ómissandi! Þegar þú ákveður að slaka aðeins á, þá opnast hurðir fyrir þér ein af annarri og þetta tímabil verður þér svo miklu auðveldara.

Það er búinn að vera stormur, en það er stormurinn á undan logninu. Haustið var tímabil breytinga og veturinn gefur þér þá ró sem þú vilt. Því eins einkennilegt og það er, þá elskar þú veturinn. Það er algengt að þú sért toppurinn á trénu og hafir ekki marga til að ráðfæra þig við um hvernig þú eigir að taka á hlutunum. Ég held að það sé óalgengast að fólk í hrútsmerkinu hafi sálfræðing, því þú vilt leysa allt einhvern veginn bara sjálfur.

Það er mjög mikilvægt að spyrja einhvern sem þú treystir um ráð og ennþá mikilvægara að þú farir eftir því. Núna mun veröldin senda þér skilaboð í gegnum náinn vin um hvernig þú eigir að tækla lífið. Þó að þér finnist vera vandræði vera í kringum þig, þá verðurðu hissa á hversu ofureinföld lausn verður send til þín. Þú ert að taka út svo mikinn þroska og þú verður vitrari og vitrari og þú ert að læra að vera algjörlega eins fordómalaus og hægt er. Þá verður orkan þín mýkri og fólk mun taka eftir því. Á þessu tímabili sem þú ert að fara inn í laðar þú til þín öðruvísi fólk.

Eitthvað nýtt og óvenjulegt. Þú sérð heildarmyndina af lífi þínu skýrar og setur orkuna þína á meiri hraða en þú ert vanur að gera. Ef það hafa verið erfiðleikar í ástamálum þínum, sem kemur svoldið skýrt fram í kortunum, þá skaltu muna það, að allt gerist af ástæðu. Það er mjög lítið til af tilviljunum. Ef þú ert á lausu, hjartað mitt, þá þarftu að muna að vera ekki feiminn. Hitt kynið á það til að misreikna þig og halda að þú hafir bara engan áhuga.

Þú skalt segja þeim sem þú hefur áhuga á, hvort sem það er í ástamálum eða ef þig vantar einhvern til að vinna með, þá skaltu segja þeim það skýrt, þú hefur engu að tapa og allt að vinna, því það er að koma svo mikil breyting á orkustöðvum þínum að þú átt eftir að koma sjálfum þér á óvart.



Frægir Hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir pírati, Anna Svava Knútsdóttir leikkona, Ólöf Erla, grafískur hönnunarsnillingur, Elton John söngvari, Salka Sól súperdrottning, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, söngkona AmabAdamA, Þórhallur Þórhallsson uppistandari, Kristín Þorsteinsdóttir, aðalritstjóri 365 miðla, Alda í Handy pandy, naglalistakona.