Loksins skoraði Zlatan í öruggum sigri Manchester United | Sjáðu mörkin

Zlatan Ibrahimovic og Paul Pogba skoruðu mörk Manchester United í 3-1 sigri gestanna á Swansea í Wales en Gylfi Þór Sigurðsson lagði upp mark Swansea í leiknum.

Jose Mourinho, knattspyrnustjóri Manchester United, var í stúkunni í dag að taka út leikbann en það virtist hafa góð áhrif á leikmenn hans sem voru búnir að leika fjóra leiki í röð án sigurs í deildinni.

Dýrasti knattspyrnumaður sögunnar, Paul Pogba, kom Manchester United yfir á 15. mínútu með viðstöðulausu skoti, óverjandi fyrir Lukasz Fabianski í marki Swansea.

Fabianski átti þó að gera mun betur sex mínútum síðar þegar skot Zlatans af 25 meta færi lak í netið í gegnum hendur pólska markmannsins.

Zlatan bætti við öðru marki sínu og þriðja marki Manchester United á 33. mínútu eftir góða skyndisókn en Swansea náði að klóra í bakkan á 69. mínútu með marki frá miðverðinum Mike van der Hoorn eftir aukaspyrnu Gylfa.

Lengra komust heimamenn ekki og fögnuðu Manchester United því sigrinum en með því komst Manchester United upp í sjötta sæti deildarinnar.