Innlent

Kosningaspjall Vísis: Menntakerfið hleypi börnunum að borðinu

Stefán Ó. Jónsson skrifar
Húmanistar vilja stórauka lýðræði í skólum landsins.  Þeir telja börn fullkomlega hæf til þess að ákveða hvað sé þeim fyrir bestu og vilja hverfa frá núverandi menntastefnu sem einblíni um of á að framleiða starfsmenn fyrir atvinnulífið.

Þetta kom fram í máli formanns flokksins, Júlíusar Valdimarssonar, í Kosningaspjalli Vísis í dag.

Hann segir að börn ættu í meira mæli að fá að hafa áhrif á það hvað er kennt í skólum landsins - út frá því hvaða þarfir nemendurnir hafa. „Þeir eiga að geta ákveðið það hvað þeir telja þörf á að læra og hvernig er lært og svo framvegis.“

Hann segir að þessi aukna lýðræðisvæðing menntakerfisins muni leiða til þess að skólarnir verði betri og nemendurna betur til þess fallna að átta sig á eigin hæfileikum. Það muni að lokum gera þá hæfari til að takast á við það sem framtíðin ber í skauti sér.

Mikilvægt er að mati Júlíusar að börn öðlist aukið sjálfstraust og læri að standa með sjálfum sér. Þá segir hann aukna aðkomu nemenda að tilhögun námsins muni hafa í för með sér bætta rökhugsun þeirra, að börnin verði meiri hópsálir, verði gagnrýnni og að þau muni eiga auðveldara með leiða sig að niðurstöðum.

Snúa frá starfsmannaáherslunni

„Þau geta algjörlega tjáð sig um það sem þau vilja,“ segir Júlíus. Hann bætir við að stefna Húmanista í þessum málum sé til þess fallin að snúa við ríkjandi áherslum í menntakerfinu sem að mati Júlíusar einbeiti sér of mikið að því að búa til starfsmenn fyrir fyrirtækjarekstur.

„Auðvitað þarf að vera starfsnám, auðvitað þarf fólk að kunna tungumál og geta reiknað og kunna grundvallaratriðin til þess að verða góðir starfsmenn. Þau eiga þó líka að læra og hafa þjálfun í því að vera sjálfbærar manneskjur sem að geta búið sér til sína framtíð á sínum forsendum - ekki á forsendum atvinnulífsins.“ segir Júlíus.

Viðtalið við Júlíus má sjá hér að ofan en þar ræðir hann meðal annars þjóðpeningakerfi, borgaralaun, lækkun kosningaaldurs og allt það sem gerir Húmaista að húmanistum.


Tengdar fréttir

Kosningaspjall Vísis: Telur það ekki mistök að hafa farið í olíuleit á sínum tíma

Rósa Björk Brynjólfsdóttir oddviti Vinstri grænna í Suðvesturkjördæmi telur að það hafi ekki verið mistök hjá Steingrími J. Sigfússyni þáverandi atvinnuvegaráðherra og flokksbróður sínum að úthluta fyrstu sérleyfunum til olíuleitar á Drekasvæðinu þó að flokkurinn sé í dag andsnúinn olíuleit. Þetta kom fram í Kosningaspjalli Vísis í dag.

Kosningaspjall Vísis: „Við erum með bestu stefnu í heimi“

Oddný Harðardóttir formaður Samfylkingar segist ekki trúa því að stefnumál flokksins séu ástæða lítils fylgis sem hann mælist nú með í skoðanakönnunum því stefna flokksins sé sú besta í heimi. Hún hefur þó ekki skýringar á hinu litlu fylgi en þetta kom fram í viðtali við Oddnýju í Kosningaspjalli Vísis í dag.




Fleiri fréttir

Sjá meira


×