Brýnt að samstaða náist um norrænt samningamódel að mati forseta ASÍ

Forseti Alþýðusambandsins sagði á þingi þess í dag mikilvægt að koma á norrænu samningamódeli á Íslandi sem tryggt hefði vinnandi fólki á Norðurlöndunum meiri kaupmátt, lægri vexti og minni verðbólgu en Íslendingar ættu að venjast. Eftir aðkomu verkalýðshreyfingarinnar að húsnæðisfrumvörpum stjórnvalda væri nú hægt að hefja uppbyggingu í húsnæðismálum.

Í ávarpi sínu á þingi Alþýðusambandsins í dag minntist forseti sambandsins þeirra sigra sem verkalýðshreyfingin hefði unnið fyrir vinnandi fólk í landinu í hundrað ára sögu sinni og þeirra víðtæku réttinda sem hún hefði tryggt með baráttu sinni. En hann sagði hreyfinguna enn hafa mikilvægu hlutverki að gegna og brýndi fólk áfram.

„En ágætu félagar. ef það er eitthvað sem hefur verið rauður þráður í okkar baráttu síðast liðinn hundrað ár, fyrir utan náttúrlega kjarabaráttuna, eru það húsnæðismálin. Öruggt húsnæði á viðunandi kjörum er grundvallar mannréttindi og launafólk hefur frá upphafi beitt verkalýðshreyfingunni og þá einkum Alþýðusambandinu til að berjast fyrir úrbótum í húsnæðismálum,“ sagði Gylfi.

Það væri því ánægjulegt að hreyfingunni hefði tekist að fá í gegn nýja löggjöf um verulega niðurgreiðslu á stofnkostnaði almennra íbúða til að leysa húsnæðisvanda tekjulægri heimila. Ásamt skuldbindingu stjórnvalda til að byggja allt að 2.300 íbúðir á næstu fjórum árum. Þótt hann teldi að það þyrfti meira til. Þá hafi ASÍ ákveðið að standa að stofnun almenns íbúðafélags ásamt BSRB. Nú sé hægt að ráðast í húsbyggingar.

Meiri óróleiki á vinnumarkaði en oft áður

Gylfi sagði meiri óróleika hafa ríkt á vinnumarkaði undanfarið ár en um langt skeið. En að lokum hefði tekist að ná samkomulagi um nýtt samningalíkan. Nauðsynlegt væri að koma á norrænu samningamódeli hér á landi sem hefði tryggt verkafólki á hinum Norðurlöndunum meiri kaupmáttaraukningu, lægri vexti og verðbólgu en hér á landi.

„Ef okkur á að takast að ná tökum á þessu hér á landi verður það ekki gert nema með samvinuverkefni á breiðum vettvangi. Stjórnmálin og vinnumarkaðurinn í samstarfi við Seðlabankann verða að taka höndum saman og endurskoða samskipti og hlutverkaskiptingu varðandi lykilþætti. Bæði efnahagsmál og félags- og velferðarmála,“ sagði forseti ASÍ.

Traust á milli aðila á vinnumarkaði og innan stjórnmálanna væri lykilforsenda fyrir að hægt væri að fara þessa leið.

„Um þetta þarf að ríkja breið sátt og skilningur á milli stjórnmálanna og vinnumarkaðrins. Við köllum þetta félagslegan stöðugleika og teljum að of langt hafi verið gengið í skattalækknum til tekjuhæsta hluta þjóðarinnar. Þannig að mikilvæg velferðarverkefni á borð við húsnæðismál, heilbrigðismál, öldrunarþjónustu, velferð og jafnræði á vinnumarkaði eru í uppnámi og verulega vanfjármögnuð,“ sagði Gylfi.

Þá sagði forseti ASÍ að ef ekki tækist samstaða um að jafna lífeyriskjörin væri hætta á að samstarf um SALEK rynni út í sandinn og þar með kjarasamningar á almennum vinnumarkaði eftir áramótin. Allir stjórnmálaflokkar sem og aðilar vinnumarkaðrins þyrftu að vinna að því að þetta gerðist ekki.

Eygló Harðardóttir félags- og húsnæðismálaráðherra þakkaði Alþýðusambandinu fyrir þátt þess í þeim húsnæðisfrumvörpum sem voru samþykkt á Alþingi í sumar og haust.

„Ég tel að með þessu muni nást þau markmið sem ég hef barist fyrir í húsnæðismálum. Sem er að skapa raunhæfa valkosti fyrir fólk, óháð efnahag og tryggja þannig heimilum landsins öruggt húsnæði,“ sagði Eygló.