Fyrsta vara Genki Instruments í augsýn

Það eru spennandi tímamót hjá Genki Instruments. Í átján mánuði höfum við unnið að því að þróa nýstárleg stafræn hljóðfæri og nýjar útfærslur á hljóðfærum sem heimurinn hefur ekki séð áður.

Undir lok náms þriggja okkar í BS-námi í rafmagnsverkfræði vorið 2015 leiddi sameiginlegur áhugi á tækni og tónlist okkur saman í vinnu við lokaverkefni í áfanga. Þar fengum við tækifæri til að hanna og þróa frumstæða frumgerð af hugarfóstri okkar.

Það fylgir því einstök og ólýsanleg tilfinning að sjá tól sem þú hefur hannað sjálfur verða til og skila því sem lagt er upp með. Jafnvel þó langt sé í að hægt sé að skilgreina tólið sem „vöru“.

Um það leyti sem við vorum að ljúka námi var auglýst eftir þátttakendum í viðskiptahraðalinn Startup Reykjavík. Við stóðumst ekki freistinguna að senda inn umsókn, jafnvel þó að í því hefði falist umtalsverð vinna í miðjum lokaprófum. Við erum þakklátir fyrir að umsókn okkar var samþykkt og stóð verkefnið yfir sumarið 2015. Við nýttum tímann vel og lögðum nótt við dag við að halda áfram vinnu við þróun hugmynda okkar, ásamt því að soga að okkur þá þekkingu og reynslu sem okkur bauðst í Start­up Reykjavík hraðlinum.

Fljótlega eftir að Startup Reykjavík hófst þá kynntumst við vöruhönnuðinum Jóni Hólmgeirssyni sem kom með reynslu og sjónarmið sem hjálpaði okkur við að sjá hugmyndir okkar í nýju og jafnvel enn meira spennandi samhengi. Þar takast fyrst tæknin og hönnunin á en renna svo saman í eina heild.

Tækniþróun er tímafrek og krefjandi glíma en með sama hætti geysilega skemmtileg og spennandi. Sérstaklega þegar afrakstur þrotlausrar vinnu skilar sér. Opnar hugbúnaðarlausnir og þrívíddarprentarar gera vinnu við gerð frumgerða aðgengilegri og auðveldari en áður. Það hefur gert okkur kleift að gera tilraunir með útfærslur sem áður hefðu ekki verið framkvæmanlegar.

Nú eru hafnar notendaprófanir á nýjustu frumgerðum fyrirtækisins. Við finnum fyrir áhuga þeirra sem þegar hafa prófað lausnirnar okkar og það er sannarlega mikilvæg hvatning. Fram undan eru spennandi tímar þegar í ljós kemur hvernig markaðurinn tekur í vörurnar okkar.

Áhugasömum er bent á Face­book-síðu Genki Instruments. Þar má fylgjast með fréttum af fyrirtækinu og vöruþróun. Genki Instruments tók þátt í Startup Reykjavík viðskiptahraðlinum 2015.