Jón Björn kjörinn ritari Framsóknarflokksins

Jón Björn Hákonarson hefur verið kjörinn ritari Framsóknarflokksins. Hann hlaut 84,7% greiddra atkvæða. 

„Þessi flokkur á ekkert nema góð hundrað ár til viðbótar," sagði Jón Björn þegar hann ávarpaði þingið eftir að tilkynnt hafði verið um sigur hans.

Gunnar Bragi Sveinsson hafði auk Jóns Björns verið í framboði til ritara en hann dró framboð sitt til baka eftir að ljóst var að Sigurður Ingi Jóhannsson hlaut meirihluta atkvæða í kjöri til formanns flokksins.

Flokksþingi Framsóknarflokksins er nú lokið en Sigurður Ingi, nýkjörinn formaður flokksins, sleit þinginu nú rétt eftir klukkan hálf sex.