Heimir: Þessir strákar vilja vera í fyrsta liðinu sem kemst á HM

Einhverjar breytingar gætu orðið á byrjunarliði íslenska landsliðsins í fótbolta gegn Finnum í dagvegna meiðsla. Það væri þó kjánalegt að breyta því sem hefur virkað inni á vellinum segir þjálfarinn, Heimir Hallgrímsson. Ísland mætir Finnlandi í kvöld á Laugardalsvellinum í öðrum leik liðanna í undankeppni HM 2018.

Íslenska landsliðið hefur verið svakalega heppið með meiðsli og leikbönn undanfarin tvö ár en nú er Kolbeinn Sigþórsson frá vegna meiðsla og standið á hópnum ekki 100 prósent.

„Til að vera heiðarlegir þá eru nokkrir leikmenn tæpir. Það er kannski óþarfi að vera að telja þá upp en það eru nokkur spurningamerki. Þetta eru tveir leikir á skömmum tíma og við verðum að vera klókir hvernig við spilum úr þessu,“ sagði Heimir við Vísi í gær.

Frá því Ísland lauk leik í undankeppni EM haustið 2015 og þar til lokahópurinn var valinn fyrir Frakkland í maí síðastliðinn prófuðu Heimir og Lars 50 leikmenn til að reyna að auka breiddina í hópnum. Og nú gæti reynt á hana í næstu leikjum.

„Það er þess vegna að við viljum ekki að umræðan snúist um þá sem eru meiddir heldur þá sem munu spila í staðinn ef þeir koma inn. Við fundum það og sáum bæði fyrir EM og í Frakklandi að það eru fullt af mönnum sem eru tilbúnir og æstir í að spila. Ég veit að þeir munu spila vel þegar kallið kemur,“ sagði Heimir.

Heimir viðurkennir að leikmennirnir áttu erfitt með að keyra sig í gang fyrir fyrsta leikinn í riðlinum gegn Úkraínu eftir ævintýrið í Frakklandi. Nú sér hann aftur á móti að kviknað er á strákunum okkar og þeir þrá ekkert heitar en komast á HM í rússlandi.

„Það hefur verið gaman að sjá stígandan á æfingunum núna. Það er klárlega miklu meiri ferskleiki núna í þessu verkefni heldur en fyrir Úkraínuleikinn. Þá voru menn að byrja sitt tímabil og margir leikmenn ekki komnir á fullt,“ sagði Heimir.

„Allir þessir strákar vilja stimpla sig inn og komast inn í lokakeppni HM. Við vitum að það verður erfitt. Það er ekki nóg að segja það. Þessir strákar vilja vera fyrsta liðið sem kemst í lokakeppni HM,“ sagði Heimir Hallgrímsson.

Alla fréttina má sjá í spilaranum hér að ofan.