Októberspá Siggu Kling – Tvíburi: Fullur af andargift og þér mun takast að klífa þetta fjall

Elsku góði Tvíburinn minn. Það er búið að vera töluvert álag og þú veist ekki alveg í hvora áttina þú ætlar að snúa þér. Það er mjög mikilvægt fyrir þig að einfalda málin og ekki vera að flækja hlutina. Þú ert svo heillandi blanda, svo litrík, og þú elskar svo heitt.

En þegar þú ert hræddur um að lífið sé ekki að ganga upp eins og þú vildir, þá missir þú mójóið þitt – þú ert miklu sterkari en þú heldur. Þú ert fullur af andargift og þér mun takast að klífa þetta fjall sem er fyrir framan þig. Þú ert að einblína of mikið á hluti sem þú getur ekki breytt og þar af leiðandi þarftu bara að sætta þig við þá, til þess að hamingjan knúsi þig. Það er mikilvægt að treysta fólki í kringum þig, segja frá hvað þig vantar, hvernig þér líður og hvað er að, þá er eins og fjall fari af bakinu á þér og þú stendur teinréttur upp.

Það er ekki hægt að segja að hversdagsleikinn sé uppáhaldið þitt, því það kraumar í þér orka sem er ekki svo gott að hemja og í guðanna bænum ekki reyna það. Það gæti verið einhver leiði í ástarsambandi hjá þér, það er á þína ábyrgð að breyta því.

Fyrir þá sem eru á lausu, þá eru margir að gefa þér auga og þú hefur svo sexí útgeislun að það að hika er sama og tapa og til að skora þarftu að þora! Þetta eru mottóin þín, ef þú ert að leita að ástinni. Næstu tveir mánuðir eru tímabilið sem skapar kraftinn þinn og lætur þig finna að þú ert ómissandi. Til hamingju með það og njóttu lífsins, það er eini tilgangurinn sem við þurfum að hafa.

Þú þarft að passa þig í peningamálum. Mér finnst hundleiðinlegt að þurfa að segja þér að þú þarft kannski ekki á öllu því að halda sem þú ert að spá í að kaupa þér né þarftu endilega að greiða upp gamlar skuldir. Kláraðu það mál með því að semja og svona heillandi týpa eins og þú getur heillað bæði manneskjur og bankastjóra á núll einni.

Knús og klapp, Sigga Kling

Sigga býður upp á þjónustunámskeið fyrir fyrirtæki af öllum t0ga: Hópefli – hressingarfyrirlestur sem getur verið hentugur í hádegishlé eða í byrjun vinnudags. Einnig tekur hún að sér hópa sem vilja eiga jákvæða og gleðilega kvöldstund. Þeir sem hafa áhuga gefa haft samband við Siggu með því að senda tölvupóst á siggakling@gmail.com