Eitt þúsund frá Allianz í ofurtjaldi á Þingvöllum

Allianz fékk leyfi frá Þingvallagarði til að reisa þar í gær eitt þúsund fermetra veisluskála.

Þjóðgarðurinn vildi ekki gleðskapinn í þinghelginni sjálfri og var veislutjaldið, sem reyndar er glerjað að hluta, því reist í Skógarhólum, þar sem Landssamband hestamanna hefur rekið áningarstað. Tjaldið verður tekið niður í dag.

Mikil öryggisgæsla var við svæðið og var ljósmyndari Fréttablaðsins beðinn að halda sig á þjóðveginum er hann reyndi að nálgast tjaldið.

Umstangið í kringum veisluna var gríðarlegt og ljóst að ekkert var til sparað. Ljós, hljóð og annað var í líkingu við stóra rokktónleika. Víkingarnir úr Rimmugýgi voru fengnir til að vera með atriði og fór fjölmennur hópur til að skemmta þýsku tryggingasölumönnunum.

Tryggingafélagið tryggði að engar upplýsingar lækju út um heimsóknina því þeir íslensku starfsmenn sem komu að heimsókninni skrifuðu undir trúnaðaryfirlýsingu og máttu engu greina frá.

Samkvæmt upplýsingum frá alþjóðaskrifstofu Allianz kom um þúsund manna hópur frá Þýskalandi hingað til lands á mánudag og leigði alla Hörpu undir ráðstefnu og fundi. Í gær var ögn frjálsari tími og skoðuðu sumir miðbæ Reykjavíkur en aðrir lögðu land undir fót.

Í gærkvöldi var svo slegið í veisluklárinn á Þingvöllum. Hópurinn heldur af landi brott í dag. Kostnaðurinn lá ekki fyrir en ljóst er að hann hleypur á milljónum króna.

„Við erum á Íslandi til að tala um tryggingar. Við völdum Ísland því hér er mikið af fólki sem lét hugmynd verða að veruleika eftir hrun fjármálakerfisins og á nú arðbær fyrirtæki. Það er gott fyrir starfsfólk okkar að tala við þannig fólk,“ segir í svari Allianz. 

Fréttin birtist fyrst í Fréttablaðinu