Zainaldin bræddi bókasafnsgesti með Litalaginu

Það braust út ósvikin gleði á Borgarbókasafni í gær þegar Zainaldin Wetti Jalkhi hóf upp raust sína.

Leikskóladrengurinn söng Litalagið fyrir nærstadda, á lýtalausri íslensku.

Það væri ekki í frásögur færandi ef ekki væri fyrir þá staðreynd að drengurinn kom hingað til lands fyrr á þessu ári.

Kristín R. Vilhjálmsdóttir deildi myndbandi af söng drengsins sem hefur nú farið sem eldur í sinu um netheima.

„Þessi fallegi strákur frá Sýrlandi greip míkrófóninn spontant á Café Lingua á Borgarbókasafni og söng á reiprennandi íslensku,“ segir Kristín með myndbandinu sem sjá má hér að neðan.