Ekki gert ráð fyrir framboði Sigurðar Inga í dagskrá Flokksþings

Óvenjumikil spenna er fyrir Flokksþingi Framsóknarflokks sem hefst eftir viku sem rekja má til þess hversu umdeildur núverandi formaður er. Eins og Vísir hefur þegar greint frá er nú yfirstandandi krísufundur hjá Framsóknarflokknum, en eins og Vísir hefur þegar greint frá er talið að meirihluti þingflokks Framsóknarflokks vilji Sigmund Davíð frá. Samkvæmt nýjustu upplýsingum hefur Sigurður Ingi Jóhannsson, sem sat fundinn, nú yfirgefið hann. Hann gaf ekki kost á viðtali.

Ekki gert ráð fyrir mótframboði í dagskrá

Fyrir liggja drög að dagskrá flokksþingsins en í henni er sem ekki sé gert ráð fyrir því að Sigurður Ingi Jóhannsson forsætisráðherra fari fram gegn Sigmundi Davíð Gunnlaugssyni formanni flokksins. Reyndar virðist ekki gert ráð fyrir því að neinn fari fram gegn Sigmundi þó svo að Sveinbjörn Eyjólfsson, forstöðumaður á Hvanná, hafi þegar gefið það út að fari enginn annar fram gegn Sigmundi Davíð, þá muni hann gera það sjálfur.

Samkvæmt heimildum Vísis úr röðum Framsóknarmanna er Sigurður Ingi ekki talinn herskár, heldur þvert á móti og hefur því verið fitjað upp á þriðja möguleikanum sem er sá að til að höggva á þann hnút sem upp er kominn verði gerð málamiðlun þess efnis að Lilja Dögg Alfreðsdóttir rísi upp og taki við sem formaður. Ekkert er þó fyrirliggjandi um þetta, en staðan er að sönnu flókin. Lilja Dögg hefur hingað til verið talin mjög handgengin Sigmundi Davíð og á að verulegu leyti frama sinn honum að þakka.

Sé aftur litið til dagskrár komandi Flokksþings þá er hún mjög svipuð þeirri dagskrá og var fyrirliggjandi fyrir síðasta Flokksþing Framsóknarmanna frá í apríl í fyrra, þó allar aðstæður séu nú aðrar. Aðeins er gert ráð fyrir klukkutíma í kosningu til formanns, varaformanns, ritara og í laga- og siðanefnd. Í ályktunum þess Flokksþings var hástemmt lof um ríkisstjórn Sigmundar Davíðs og í dagskrá þessa Flokksþings er sem það hafi ekki gerst að Sigmundur Davíð hrökklaðist úr stóli forsætisráðherra og Sigurður Ingi tók við.

Gert er ráð fyrir því að Sigmundur Davíð tali í 70 mínútur, en hvergi er gert ráð fyrir forsætisráðherra, sem er Sigurður Ingi, í dagskrá. Mun nokkur urgur vera í ýmsum Framsóknarmanninum vegna þessa.

Margir skora á Sigurð Inga

Sigurður Ingi, sem nú er varaformaður flokksins, tilkynnti að hann myndi ekki gefa kost á sér aftur í þá stöðu að óbreyttu. Það hefur verið túlkað á þá leið að hann íhugi að gefa kost á sér til formanns, en hann hefur varist allra frétta eftir þessa yfirlýsingu sem vakti mikla athygli. Samkvæmt heimildum Vísis er mjög stirt á milli formanns og varaformanns og er varla að þeir talist við.

Sigmundur Davíð hefur greint frá því að fyrir liggi drengskaparloforð Sigurðar Inga þess efnis að hann muni ekki fara fram gegn sér, eftir þá erfiðu stöðu sem upp kom eftir Wintrismálið, sem svo leiddi til afsagnar Sigmundar Davíðs.

En, vika er langur tími í pólitík. Fyrir liggja áskoranir til hans þess efnis frá fjórum Framsóknarfélögum. Auk þess hefur fyrrum formaður og þungavigtarmaður innan Framsóknarflokksins, Guðni Ágústsson, talað fyrir því að Sigmundur víki fyrir Sigurði Inga.

Er Sigurður Ingi búinn að tapa mómentinu?

Össur Skarphéðinsson, þingmaður Samfylkingarinnar, sá sem gerst þekkir til í hinni pólitísku refskák, hefur látið þess svo getið á Facebook að Sigurður Ingi kunni að hafa glatað tækifærinu eftir að fyrir lá glæsilegt kjör Sigmundar Davíðs á kjördæmaþingi, þá í fyrsta sæti í Norð-austurkjördæmi.

„Mómentið er farið hjá Sigurði Inga. Nú verður miklu erfiðara og blóðugara, fyrir hann að bjóða sig fram gegn sitjandi formanni, sem nánast var klappaður upp í eigin kjördæmi. Hik Sigurðar Inga kann að reynast hið dýrkeyptasta í sögu Framsóknar. Að hika er oft sama og tapa. Það gildir um ástir, viðskipti – en einkum þó í stjórnmálum.“

Sé rýnt í dagskrá Flokksþingsins virðist sem svo að sá sem drögin setti saman sé annað hvort handgenginn Sigmundi Davíð, ekki er gert ráð fyrir neinum ræðuflutningi í tengslum við kynningar á hugsanlegu framboði, eða að sá hafi traustar heimildir fyrir því að ekki komi til uppgjörs á Flokksþinginu. Hins vegar virðist svo, sé miðað við þær hræringar sem nú eru uppi í tengslum við krísufundinn, að sá kunni að endurskoða þær hugmyndir.