Kaupþing svarar fyrir sig vegna bónusgreiðslna

Eignarhaldsfélagið Kaupþing birti tilkynningu á vef sínum í morgun vegna bónusgreiðslna til starfsmanna sem samþykktar voru á aðalfundi félagsins á þriðjudagskvöld. Í tilkynningunni kemur fram að bónusgreiðslur til starfsmanna félagsins, sem eru fleiri en þrjátíu talsins og flestir íslenskir, geti numið allt að núll krónum til 1,5 milljarðra króna, eða 9,3 milljóna punda. Inni í þessu kaupaukakerfi eru ekki forstjóri og framkvæmdastjóri félagsins.

Í tilkynningunni er það rakið hvað sé markmiðið með bónusgreiðslunum. Er það í fyrsta lagi til þess að hámarka virði eigna félagsins, í öðru lagi til að halda í gott starfsfólk og í þriðja lagi til þess hvetja starfsmenn til að vinna störf sín á skilvirkan hátt þar til félaginu er lokað.

Greint var frá bónusgreiðslunum í DV í liðinni viku en þær eru vægast sagt mjög umdeildar og hafa þingmenn meðal annars lýst þeir skoðun að leggja eigi á þær nokkurs konar ofurskatta, allt að 98 prósent. Þá sagði Sigurður Ingi Jóhannsson forsætisráðherra í fréttum Stöðvar 2 í gær að greiðslurnar væru taktlausar og jafnvel siðlausar.

Í tilkynningu Kaupþings kemur fram að á aðalfundinum á þriðjudag hafi hluthafar eða fulltrúar hluthafa sem eiga 88,12 prósent í Kauþingi mætt. Mikill meirihluti þeirra, eða 91 prósent, samþykkti að greiða starfsmönnum kaupaukann. Þá segir jafnframt að Kaupþing sé eignarhaldsfélag sem starfi samkvæmt íslenskum lögum. Það sé ekki banki eða fyrirtæki sem veiti fjármálaþjónustu.

Þá er það einnig rakið að Kaupþing sé ekki í slitameðferð eða til gjaldþrotaskipta þar sem því ferli hafi lokið með nauðasamningum við kröfuhafa í fyrra.

Mikill meirihluti hluthafa Kaupþings, eða 93 prósent, eru erlendir. Meginmarkmið eignarhaldsfélagsins sé að hámarka eignir þessara hluthafa en að mestu leyti er um erlendar eignir að ræða; erlendan gjaldeyri, lán eða hlutabréf. Kaupþing á engin íslensk húsnæðislán að því er fram kemur í tilkynningunni.

Þá er sérstaklega tekið fram í tilkynningunni að Kaupþing stjórni ekki Arion banka, en félagið á 87 prósent hlut í bankanum. Í tilkynningunni segir að í Arion banka starfi framkvæmdastjórn sem starfi undir stjórn bankans sem er óháð Kaupþingi, og það hafi verið svo allt frá árinu 2009 samkvæmt kröfum Fjármálaeftirlitsins.